Gücün yumşağı
Natiq Cəfərli
Respublikaçı Alternativ Partiyası
Proqnozlara görə, 30 ildən sonra Azərbaycanın 12,1 milyon nəfər, Gürcüstanın 2,9 milyon nəfər, Ermənistanın 2,8 milyon nəfər əhalisi olacaq. Ermənistanda ikili vətəndaşlıq sistemi tətbiq edildiyi nəzərə alınsa, həmin dövrə ölkədə 2 milyon nəfərdən də az əhali qalacaq.
Digər proqnozlara əsasən, 2050-ci ildə Ermənistan əhalisinin 80 faizi İrəvanda yaşayacaq, Azərbaycanla sərhəd rayonlarda əhali daha kəskin azalacaq.
Cəmi 30 ildən sonra 18 milyona yaxın Cənubi Qafqaz əhalisinin 12 milyonundan çoxu Azərbaycanda yaşayacaq, bölgə iqtisadiyyatının 75-80 faizi bizim ölkənin payına düşə bilər.
Biz indi normal sistem qurmağa başlasaq, iqtisadiyyatımızı inkişaf etdirsək, ölkədə hakimiyyət qolları bölgüsünü təcəssüm etdirən idarəetmə modeli qursaq, işğaldan azad edilmiş torpaqlara yaxın 10 ildə 1,5 milyon vətəndaşımızı köçürüb orada iqtisadi fürsətlər, keyfiyyətli yaşam qura bilsək, yaxın 30 ildə məmləkətimiz bölgəmizin şəksiz lideri olacaq.
O zaman Zəngəzura, Göyçəyə ev tikməyə, iş qurmağa, biznes yaratmağa gedəcəyik. Bunu sülhlə, qonşularla normal münasibət qurmaqla, iqtisadi, elmi güclə etməliyik, top-tüfənglə yox.
Bizim yumşaq güc olmaq şansımız var, bunun üçün peşəkar ordu, ittifaqlar qurmaqla yanaşı normal, insana xidmət edən işlək sistem də qurmalıyıq.
Müəllifin başqa yazıları:
Sivil toplum, toplumla sivil davranış
Qiymət artımının sirr olmayan sirri
