Təbliğatı vuran rəqəmlər
Natiq Cəfərli
Son beş ildə hökumətin ən çox təbliğat qurmağa çalışdığı sahələrdən biri aqrar sektordur. Hər rəsmi tədbirdə kənd təsərrüfatının analoqu olmayan inkişafından, qeyri-neft sektorunun aparıcı sahəsi kimi ixrac potensialını artırmasından danışırdılar. Ən çox pomidor və fındıq ixracı qabardılırdı.
Rəsmi rəqəmlər tam tərsini deyir. Bu ilin mart ayında cəmi 7,1 milyon dollar dəyərində pomidor ixrac edilib. Keçən ilin martında bu rəqəm 19,2 milyon dollar idi, 2,7 dəfə (!!!) azalma var.
Bu, tək mart ayı üçün vəziyyət deyil. 2021-ci ilin yanvar-mart aylarında cəmi 21,3 milyon dollar dəyərində pomidor ixracı olub. 2020-ci ilin eyni dövründə 44 milyon dollara yaxın ixrac vardı. Azalma 2,1 dəfədən çoxdur.
Bu ilin mart ayında Azərbaycan xarici ölkələrə 9,7 milyon dollar dəyərində fındıq ixrac edib – 2020-ci ilin mart ayının göstəricisi ilə müqayisədə 4,4 milyon dollar və ya 31,2% az.
Yanvar-mart ayları ərzində Azərbaycan xarici ölkələrə 28,5 milyon dollar dəyərində fındıq ixrac edib, bu da 2020-ci ilin ilk üç ayına nəzərən 7,8 milyon dollar, yəni 21,5% azdır.
Hökumət rəqəmlərdə belə kəskin azalma olmasını analiz edibmi? Səbəblər araşdırılıbmı? Heç inanmıram.
Biri çıxıb deyəcək ki, Rusiya bəzi əngəllər yaratdı, pomidor ixracı azaldı, amma izah edə bilməyəcək nədən Azərbaycan bir bazardan bu qədər asılıdır? Niyə yeni bazarları çıxış imkanları təşviq edilmir? Niyə, məsələn, Şəmkir fermerləri vəziyyətlə bağlı qan ağlayanda hökumətdən heç kim onlara dəstək olmadı? Niyə pomidor sahəsini belə inhisara almaq cəhdlərinin qarşısı alınmadı?
Suallar çox, hesabatlı hökumət isə yox…
Müəllifin başqa yazıları:
Sivil toplum, toplumla sivil davranış
