Saleh Rüstəmov: ümid doğrulmadı

30 Dekabr 2021
comments
Novator.az
Posted in Xəbər

Dekabrın 30-u Bakının Nizami Rayon Məhkəməsində məhbus Saleh Rüstəmovun vəkillərinin vəsatətinə baxılıb.

Vəkillər dekabrın 6-da məhkəməyə təqdim etdikləri vəsatətdə Saleh Rüstəmovun böyrək çatışmazlığından və başqa xəstəliklərdən əziyyət çəkdiyini, noyabrın 6-dan keçirdiyi aclıq aksiyası nəticəsində orqanizminin zəiflədiyini bildirmiş və səhhətinin nəzərə alınaraq həbsdən azad olunmasını istəmişdilər.

Novator.az-ın məlumatına görə, vəsatətə hakim Nəriman Mehdiyev baxıb. O, Saleh Rüstəmovun səhhəti ilə bağlı vəziyyətin müəyyənləşdirilməsi üçün tibbi ekspertiza təyin edib. Beləliklə, vəkillərin vəsatətinin təmin olunub-olunmayacağı yalnız ekspertiza keçiriləndən və ekspertiza rəyi məhkəməyə təqdim ediləndən sonra bilinəcək. Bu isə Saleh Rüstəmovun 2021-ci ilin sonlarında azadlığa buraxılacağına olan ümidlərin puça çıxması deməkdir. Çünki dekabrın 30-u ilin sonuncu iş günüdür. Ekspertizanın keçirilməsi, rəyin məhkəməyə çatdırılması, məhkəmənin həmin rəy əsasında vəkillərin vəsatətinə baxıb qərar çıxarması ən yaxşı halda gələn ilin yanvarında reallaşa bilər. Əlbəttə, bu da bir ümiddir – məhkəmə vəsatəti rədd etməklə onu da puça çıxarmasa…

1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı postunu tutmuş Saleh Rüstəmov Birinci Qarabağ müharibəsinin veteranıdır. 1992-ci ildə Gədəbəyin Başkənd kəndinin erməni işğalından azad edilməsi əməliyyatının rəhbərlərindən olub.

1997-ci ildən Rusiyada yaşayan Saleh Rüstəmov ticarət sahəsində fəaliyyət göstərib. 2018-ci il mayın 8-i Azərbaycanda tutulub, bir qrup şəxslə birgə qanunsuz sahibkarlıqda, pul vəsaitlərini qanunsuz leqallaşdırmaqda təqsirləndirilib. İttihama görə, Saleh Rüstəmov AXCP-ni qanunsuz maliyyələşdirib, tutulan digər şəxslər bu işdə ona yardımçı olublar.

2019-cu il fevralın 27-də Bakı Ağır Cinayətlər Məhkəməsi Saleh Rüstəmova 7 il 3 ay azadlıqdan məhrumetmə cəzası kəsib, ona və qohumlarına məxsus daşınmaz əmlakların müsadirə olunmasını hökm edib.

AXCP üzvü Aqil Məhərrəmov 4 il, Babək Həsənov 3 il azadlıqdan məhrumetmə cəzaları, Saleh Rüstəmovun qardaşı oğlu Vidadi Rüstəmli ilə Ruslan Nəsirov (o vaxt AXCP üzvü olub) 6 il 8 aylıq şərti cəzalar alıb.

2019-cu il sentyabrın 25-də Ali Məhkəmə həmçinin qanunsuz narkotik vasitə saxlamada ittiham olunan Saleh Rüstəmovun cəzasını 2 ay azaldıb.

2021-ci il martın 18-də Babək Həsənov prezident sərəncamı ilə əfv edilib.

2021-ci il noyabrın 6-da Saleh Rüstəmov həbsdən buraxılması tələbi ilə aclıq aksiyasına başlayıb. Noyabrın 8-də o, Bakıdakı 13 saylı Cəzaçəkmə Müəssisəsindən Penitensiar Xidmətin Müalicə Müəssisəsinə köçürülüb. Dekabrın 13-də Saleh Rüstəmov su qəbulundan imtina edərək quru aclığa keçib. O, aclığı yalnız dekabrın 16-da – ailə üzvlərinin, qohumlarının və ictimaiyyət nümayəndələrinin təkidli xahişlərindən sonra dayandırıb.

About author

Son materiallar

Tags

Rəylər

Do not miss

Son materiallar