Yanvarın 7-də Bakı Ağır Cinayətlər Məhkəməsində AXCP üzvlərinin işi üzrə hazırlıq iclası keçirilib.

İşə hakim Eldar İsmayılovun sədrliyi ilə baxılır. Digər hakimlər Cavid Hüseynov və Samir Əliyevdir.

Məhkəmə qarşısına AXCP Ali Məclisi Rəyasət Heyətinin üzvü Aqil Məhərrəmli, partiyanın Nərimanov rayon şöbəsinin sədri Babək Həsənov, Gənclər Komitəsi Məclisinin sədri Ruslan Nəsirli, Gədəbəy Rayon İcra Hakimiyyətinin keçmiş başçısı Saleh Rüstəmov və onun qardaşı oğlu Vidadi Rüstəmli çıxarılıb.

1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı vəzifəsində çalışmış, 1997-ci ildən Rusiyada yaşayan və orada bizneslə məşğul olan Saleh Rüstəmov 2018-ci ilin mayında qohumunun yas mərasimində iştirak etmək üçün Gədəbəyə gəlib. Mayın 8-də o, Rusiyaya qayıtmaq üçün Gədəbəydən Bakıya yola düşərkən Şəmkir yaxınlığında, qardaşı oğlu Vidadi Rüstəmli ilə birgə tutulub.

Mayın 25-də isə bu iş üzrə Aqil Məhərrəmli, Babək Həsənov və Ruslan Nəsirli də saxlanıblar.

Onların hamısı barəsində həbs qətimkan tədbiri seçilib.

Həbs edilənlər qanunsuz sahibkarlıqda, pul vəsaitlərini qanunsuz leqallaşdırmaqda və Cinayət Məcəlləsinin digər maddələri ilə təqsirləndirilirlər.

İttihama görə, Saleh Rüstəmov AXCP-ni qanunsuz maliyyələşdirib, tutulan digər şəxslər bu işdə ona yardımçı olublar. AXCP sədri Əli Kərimli bu işi partiyaya qarşı illərdir davam edən repressiyaların tərkib hissəsi kimi qiymətləndirir.

Hazırlıq iclasında təqsirləndirilən şəxslərin vəkilləri İlhamə Həsənova, Cavad Cavadov, Fariz Namazlı, Aqil Layıcov müxtəlif vəsatətlər qaldırıblar. Vəsatətlərin heç biri təmin olunmayıb. İş üzrə məhkəmə baxışı yanvarın 15-nə təyin olunub.

Azadliq.org xəbər verir ki, iclası izləməyə gələnlərin əksəriyyəti məhkəmə zalına daxil ola bilməyib. Məhkəmə binasının qarşısında hazırlıq iclasını müşahidə etmək istəyən AXCP üzvləri ilə polislər arasında insident baş verib. Polis bəzi cəbhəçiləri tutaraq aparıb. Polisin tutduğu cəbhəçilər bir neçə saat sonra sərbəst buraxılıblar.