Saleh Rüstəmov qərar ərəfəsində

04 Dekabr 2021
comments
hikmet
Posted in Manşet Xəbər

Məhbus Saleh Rüstəmov aclıq aksiyasını davam etdirir. Dekabrın 4-də “Turan”a açıqlama verən vəkil Bəhruz Bayramov deyib ki, davamlı aclıq nəticəsində Saleh Rüstəmovun vəziyyəti çox ağırdır: “Əsəb sistemində, beyninin fəaliyyətində problemlər yarandığı hiss olunur. Aram-aram danışır, vaxtaşırı üzü sanki donur”.

Vəkilin sözlərinə görə, Saleh Rüstəmov ondan dekabrın 6-da yanına gəlməyi xahiş edib: “Həmin gün o, quru aclıq haqqında yekun qərar vermək niyyətindədir. Həkimlər bildirir ki, Saleh Rüstəmov su içməkdən imtina edərsə, orqanizmi bir gün belə tab gətirməyəcək”.

1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı postunu tutmuş məhbus Saleh Rüstəmov noyabrın 6-dan aclıq aksiyası keçirir. Noyabrın 8-də o, Bakıdakı 13 saylı Cəzaçəkmə Müəssisəsindən Penitensiar Xidmətin Müalicə Müəssisəsinə köçürülüb.

Saleh Rüstəmov həbsdə qanunsuz saxlandığını bildirir, azadlığa buraxılmasını istəyir.

1997-ci ildən Rusiyada yaşayan Saleh Rüstəmov ticarət sahəsində fəaliyyət göstərib. 2018-ci il mayın 8-i Azərbaycanda tutulub, bir qrup şəxslə birgə qanunsuz sahibkarlıqda, pul vəsaitlərini qanunsuz leqallaşdırmaqda təqsirləndirilib. İttihama görə, Saleh Rüstəmov AXCP-ni qanunsuz maliyyələşdirib, tutulan digər şəxslər bu işdə ona yardımçı olublar.

2019-cu il fevralın 27-də Bakı Ağır Cinayətlər Məhkəməsi Saleh Rüstəmova 7 il 3 ay azadlıqdan məhrumetmə cəzası kəsib, ona və qohumlarına məxsus daşınmaz əmlakların müsadirə olunmasını hökm edib.

AXCP üzvü Aqil Məhərrəmov 4 il, Babək Həsənov 3 il azadlıqdan məhrumetmə cəzaları, Saleh Rüstəmovun qardaşı oğlu Vidadi Rüstəmli ilə Ruslan Nəsirov (o vaxt AXCP üzvü olub) 6 il 8 aylıq şərti cəzalar alıb.

2019-cu il sentyabrın 25-də Ali Məhkəmə həmçinin qanunsuz narkotik vasitə saxlamada ittiham olunan Saleh Rüstəmovun cəzasını 2 ay azaldıb.

2021-ci il martın 18-də Babək Həsənov prezident sərəncamı ilə əfv edilib.

Saleh Rüstəmov Birinci Qarabağ müharibəsinin veteranıdır. 1992-ci ildə Gədəbəyin Başkənd kəndinin erməni işğalından azad edilməsi əməliyyatının rəhbərlərindən olub.

Dekabrın 4-də bir qrup ictimai-siyasi fəal, hüquqşünas, jurnalist çağırış yayıb. Hakimiyyətə səslənən həmin şəxslər Saleh Rüstəmovun ölüm riskinin bütün cəmiyyətdə ciddi həyəcan doğurduğunu vurğulayırlar: “Bu narahatlıqlara, ölüm riskinə rəğmən onun hələ də həbsdə saxlanması, gərəkli addımların atılmaması Qarabağ müharibəsi zamanı və müharibə sonrası formalaşmaqda olan qarşılıqlı etimad, güvən mühitinə ciddi yaralar vurmaqdadır. Cəmiyyətin bu hadisədən narahat olan müxtəlif təbəqələrindən ölkə rəhbərliyinə, hökumətə ünvanlanan çağırışlar, təəssüflər olsun ki, indiyə qədər diqqətə alınmayıb və zəruri addımlar atılmayıb”.

60 nəfərin (Aqil Layıc, Alya Yaqublu, Anar Məmmədli, Azər Mehtiyev, Bəxtiyar Hacıyev, Cavad Cavadov, Elçin Sadıqov, Ələsgər Məmmədli, Ənnağı Hacıbəyli, Əsabəli Mustafayev, Hafiz Həsənov, Xalid Ağalıyev, Xədicə İsmayıl, İntiqam Əliyev, Qabil Abbasoğlu, Qənimət Zahid, Mehman Əliyev, Mehman Hüseynov, Nemət Kərimli, Nəsimi Məmmədli, Rövşən Ağayev, Rövşən Hacıbəyli, Rüfət Səfərov, Samir Əliyev, Seymur Kazımov, Şahin Cəfərli, Şahvələd Çobanoğlu, Şəmşad Ağa, Yadigar Sadıqlı, Yalçın İmanov, Zöhrab İsmayıl və başqaları) qoşulduğu çağırışda hakimiyyətin ən qısa zamanda Saleh Rüstəmovun azadlığa buraxılması üçün mümkün hüquqi və siyasi mexanizmləri işə salmalı olduğu qeyd edilir.

AXCP-yə rəsmi ittihamlar

Cəbhəçilərin həbs müddəti uzadılıb

Cəbhəçilərin istintaqı başa çatıb

Cəbhəçilərin məhkəməsi təyin olunub

Cəbhəçilərin məhkəməsi başladı

Cəbhəçilər özlərini təqsirli bilmədiklərini deyiblər

Cəbhəçi işgəncələrə məruz qaldığını deyir

Sabiq icra başçısı da işgəncələrdən danışıb

Cəbhəçilərin məhkəməsi: şahidlər dindirilib

Binanın içində məhkəmə, çölündə tutqu davam edir

Hakimlər Əli Kərimlinin dindirilməsinə razılaşmadı

Cəbhəçilərə cəzalar təklif olunub