Əli Kərimli: “Hakimiyyəti inandırmalıyıq ki…”
AXCP sədri Əli Kərimli həbsdə aclıq aksiyası keçirən Saleh Rüstəmovu azadlığa buraxmağa çağırıb. Novator.az-ın məlumatına görə, siyasətçi yazır: “Gerçək bir vətənpərvər, Qarabağ qazisi, əqidəli və dürüst insan Saleh Rüstəmov hər gün bir az da ölümə yaxınlaşır. Saleh bəyin 58 yaşı var, noyabrın 6-da başladığı aclığı davam etdirir. Vəziyyəti çox ağırlaşıb. Ölkə ictimaiyyəti, daha doğrusu, ictimaiyyət adına kimlərimiz qalıbsa, hərə öz üslubunda Saleh bəyə azadlıq tələb edir. Hakimiyyət isə bütün bu çağırışlara gözünü yumub, qulağını tıxayıb.
Saleh Rüstəmovun həyatına biganə münasibət intihar həddinə çatdırılan qazilərimizin, şəhid analarının taleyinə olan biganəliyin davamıdır. Hakimiyyət özünü inandırıb ki, xalqdan heç bir asılılığı yoxdur, xalq ona heç nə edə bilməz. Düşünür ki, xalqın əsas təyinatı əsgər olaraq vuruşmaq, fəhlə, kəndli, məmur olaraq hakim qruplaşmanın maraqları üçün işləmək və istehlakçı, müştəri olaraq ailə şirkətlərini varlandırmaqdır. Onlar inanırlar ki, xalqın hüquqları yox, yalnız vəzifələri var. Düzmü düşünürlər? Yox, səhv düşünürlər.
Ancaq səhv düşündüyünü hakimiyyətə başa salacaq qüvvə də yalnız xalqın özü ola bilər və olmalıdır. Saleh Rüstəmova azadlıq tələbimiz daha kütləvi olmalı, daha qətiyyətlə səslənməlidir. Hakimiyyəti inandırmalıyıq ki, Saleh Rüstəmov və digər Qarabağ qazilərinə bəzən laqeyd, bəzən nankor, bəzən düşməncəsinə münasibət bir gün mütləq hakimiyyətin öz əleyhinə çevriləcək. Xalq elə ilk imkandaca bu münasibətin məsuliyyətini onlardan tələb edəcək.
Saleh Rüstəmovun həyatı ilə oynamayın. Saleh bəyi və digər siyasi məhbusları azad edin, Qarabağ qazilərinə və şəhid ailələrinə nankor münasibətə son qoyun!”
1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı postunu tutmuş Saleh Rüstəmov noyabrın 6-dan aclıq aksiyası keçirir, noyabrın 8-də Bakıdakı 13 saylı Cəzaçəkmə Müəssisəsindən Penitensiar Xidmətin Müalicə Müəssisəsinə köçürülüb.
Saleh Rüstəmov həbsdə qanunsuz saxlandığını bildirir, azadlığa buraxılmasını istəyir.
1997-ci ildən Rusiyada yaşayan Saleh Rüstəmov ticarət sahəsində fəaliyyət göstərib. 2018-ci il mayın 8-i Azərbaycanda tutulub, bir qrup şəxslə birgə qanunsuz sahibkarlıqda, pul vəsaitlərini qanunsuz leqallaşdırmaqda təqsirləndirilib. İttihama görə, Saleh Rüstəmov AXCP-ni qanunsuz maliyyələşdirib, tutulan digər şəxslər bu işdə ona yardımçı olublar.
2019-cu il fevralın 27-də Bakı Ağır Cinayətlər Məhkəməsi Saleh Rüstəmova 7 il 3 ay azadlıqdan məhrumetmə cəzası kəsib, ona və qohumlarına məxsus daşınmaz əmlakların müsadirə olunmasını hökm edib.
AXCP üzvü Aqil Məhərrəmov 4 il, Babək Həsənov 3 il azadlıqdan məhrumetmə cəzaları, Saleh Rüstəmovun qardaşı oğlu Vidadi Rüstəmli ilə Ruslan Nəsirov (o vaxt AXCP üzvü olub) 6 il 8 aylıq şərti cəzalar alıb.
2019-cu il sentyabrın 25-də Ali Məhkəmə həmçinin qanunsuz narkotik vasitə saxlamada ittiham olunan Saleh Rüstəmovun cəzasını 2 ay azaldıb.
2021-ci il martın 18-də Babək Həsənov prezident sərəncamı ilə əfv edilib.
Saleh Rüstəmov Birinci Qarabağ müharibəsinin veteranıdır. 1992-ci ildə Gədəbəyin Başkənd kəndinin erməni işğalından azad edilməsi əməliyyatının rəhbərlərindən olub.
Cəbhəçilərin həbs müddəti uzadılıb
Cəbhəçilərin istintaqı başa çatıb
Cəbhəçilərin məhkəməsi təyin olunub
Cəbhəçilərin məhkəməsi başladı
Cəbhəçilər özlərini təqsirli bilmədiklərini deyiblər
Cəbhəçi işgəncələrə məruz qaldığını deyir
Sabiq icra başçısı da işgəncələrdən danışıb
Cəbhəçilərin məhkəməsi: şahidlər dindirilib
Binanın içində məhkəmə, çölündə tutqu davam edir
Hakimlər Əli Kərimlinin dindirilməsinə razılaşmadı
Cəbhəçilərə cəzalar təklif olunub
Cəbhəçilərin işi: vəsatətlər təmin olunmayıb
Ali Məhkəmə AXCP işi üzrə qərar çıxardı
“Heç bir biznesim yoxdur və olmayıb”
Sabiq icra başçısı koronavirusa yoluxub?
Saleh Rüstəmov işində müsadirə raundu
Saleh Rüstəmovdan quru aclıq anonsu
Saleh Rüstəmovun səhhəti ağırlaşıb
