İki məqam, bir nəticə
Natiq Cəfərli
Türkiyə ilə bağlı, amma Azərbaycana aid olan iki statistik məlumata diqqət çəkək.
2021-ci ilin yanvar-iyun aylarında azərbaycanlılar Türkiyədə 593 mənzil alıblar. Ötən ilin eyni dövründə Türkiyədə azərbaycanlılara 431 mənzil satılmışdı. İllik artım 162 mənzil eləyir.
Türkiyədə mənzilin orta qiymətinin 150 min dollar olduğunu nəzərə alsaq, bizimkilər təqribən 90 milyon dollarlıq daşınmaz əmlak alıblar. Bu bir daha onu sübut edir ki, Azərbaycan vətəndaşı əlində olan sərbəst vəsaiti məmləkətə yatırmaq istəmir, ölkədə iş qurmağı, investisiya qoymağı düşünmür, imkan tapan kimi vəsaitini qonşu ölkələrə çıxardır.
İkinci məqam. Bu ilin ilk yarısında Türkiyə podratçıları 33 xarici ölkədə 6,5 milyard ABŞ dolları dəyərində 100 layihə həyata keçirib. Azərbaycan bu baxımdan dördüncü yerdədir, türkiyəlilər bu ilin ilk altı ayında ölkəmizdə 543 milyon dollarlıq təmir-tikinti işləri həyata keçirib. Azərbaycan hökuməti ölkədə əsasən büdcə investisiyaları hesabına təmir-tikinti işləri həyata keçirən xarici şirkətləri sərmayəçi kimi təqdim edir. İndi xarici şirkətlər işğaldan azad edilən ərazilərin bərpasına ayrılan büdcə vəsaiti üçün növbədə dayanırlar, onlar sərmayədar deyil, pul qazanmağa gələn iş adamlarıdır.
Bu il işğaldan azad edilən ərazilərin bərpasına 2,2 milyard manat ayrılıb, yaxın 8-10 ildə hər il bu rəqəm artacaq, ümumilikdə 2030-cu ilə qədər təqribən 50 milyard manat həcmində təmir-bərpa işləri görüləcək, xarici şirkətlər məhz bu layihələrə hədəflənib, Azərbaycanda öz ciblərindən investisiya qoymaq istəmirlər. Onları qınamaq da olmur – investisiya üçün qanunun aliliyi, müstəqil məhkəmə sistemi lazımdır.
Müəllifin başqa yazıları:
Sivil toplum, toplumla sivil davranış
Qiymət artımının sirr olmayan sirri
