Xilaskar, müsəlman dünyası, tənha ağac, təhqir edilmiş şair…
“Düşüncələr” silsiləsindən
Mətanət Natiq
Xilaskar
Sizə bir insandan danışmaq istəyirəm. Allahın sayəsində insanlar onun əliylə şəfa tapır. Bu gözəl insan – istedadlı, öz sahəsində uğurlar qazanmış həkim qastroentoloq-endoskopist Ülvi İbrahimovdur.
Onun köməyilə mən və mənim kimi neçə-neçə xəstə sağalıb.
Nədənsə insanlarda belə fikir formalaşıb ki, orta yaşlı və yaşlı həkimlər daha yaxşıdırlar, onlar çox bilirlər. Amma həmişə belə deyil. Ülvi doktor öz sahəsində sözünü demiş, sözün əsl mənasında uzman adamdır. Gənc olmasına baxmayaraq bu sahədə nailiyyəti çoxdur. Sözün doğrusu, mən də onu birinci dəfə görəndə ürəyimdə tərəddüd yaranmışdı. Amma onun düzgün müalicəsi məni normal həyata qaytardı.
Yaxşı həkim olmaqla yanaşı çox səbirli, təmkinlidir. Bütün xəstələri səbirlə dinləyir, məsləhətlər verir. Üzündən təbəssüm heç vaxt əskik olmur.
Arzulayıram ki, Ülvi İbrahimov kimi həkimlərimiz çox olsun. Onu tez-tez televiziya ekranında görürəm. Sevinirəm onun uğurlarına. Deyirəm nə yaxşı ki, varsınız, Ülvi doktor. Təşəkkürlər, xilaskar həkim!
Müsəlman dünyası
Bir gün internetdə on səkkiz yaşlı əfqan qızların şəklini gördüm. İkisinin də üzünün bir tərəfi gözəl, o biri tərəfi isə dəhşətli halda idi. Sən demə, bu qızların ərləri ikinci dəfə evlənmək üçün bu zavallı qızcığazların üzünü kislota, yəni sulfat turşusu ilə yandırıblarmış.
Vəhşiliyə baxın! Müsəlman dünyasında nə baş verir? Günün günorta çağı bir jurnalist konsulluğa girir və yox olur. Adam o jurnalistin başına gətirilənləri eşidəndə tükləri ürpəşir.
Yenə də kökü gedib çıxır müsəlman dünyasına. Məgər yenidən evlənmək üçün o qızları mütləq o hala salmaq lazımdır? Bəs o jurnalistin aqibəti? Adamla belə haqq-hesab çəkərlərmi?
Belə şeyləri eşidəndə az qalır müsəlman olduğuna utanasan. Məncə bu vəhşiliklər əxlaqın əsir düşdüyündəndir.
Tənha ağac
Bir ağac gördüm – yarpaqları saralmış, amma tökülməmiş tənha bir ağac. Bu tənha ağacı bənizi solmuş, düşüncələrdən qəlbi yorulmuş insana bənzətdim. Yarpaqları nəsə pıçıldayırmış kimi titrəyirdi.
Yaşamağa, xoşbəxtliyə layiq, gözləri yollara dikilmiş, həsrətlə gözləyən adama bənzətdim bu tənha ağacı. Payız günəşi nə qədər isti olsa da yarpaqları ağacın üstündə saxlaya bilmir. Yarpaqlar yavaş-yavaş xəfif küləkdən tökülürdü. Çünki payızdır…
Ətrafda səssizlik hökm sürür. Bir suala cavab axtarırdım. Səssizlik suala ən yaxşı cavabdır.
Təhqir edilmiş şair
İçərişəhərdə kursdaydım. Pəncərədən aşağı, Əliağa Vahidin büstü qoyulmuş parka baxırdım. Parkda çoxlu turist var idi. Onlar büstün yanında foto çəkirdilər. Bələdçi də var idi. Turistlərdən biri öz telefonuyla selfi çəkirdi və sonra telefonu tanışına verib yenidən büstün yanına qayıtdı. Əlindəki siqareti büstün ağız hissəsinə tutub, gülümsəyərək şəkil çəkdirdi. Bunu bələdçi görürdü. Amma heç bir söz demədi.
Bir an özümü də, şairi də təhqir olunmuş hiss etdim. Bir ərəbin bu hərəkətini xalqıma təhqir saydım. Özümə sual verdim: biz onların ölkəsində büstlərini belə təhqir etsəydik necə olardı?
Allah bağışlasın
Yuxarıdakı qonşuyla liftə tez-tez bir yerdə minirik. Bir gün yenə liftə minmək istəyəndə uşaq düyməni tələsik basdı, arxası mənə olduğundan məni görmədi.
Ertəsi gün yenə liftə bir yerdə mindik və qonşu xanım üzünü mənə tutub “Siz Allah, bağışlayın keçən dəfəkinə görə, uşaq görmədi, düyməni basdı” dedi.
Dedim: “Allah bağışlasın!”
Gözəl sözdür. Bağışlayan Allahdır!
Müəllifin başqa yazıları:
Ümidlə yolçuluq
Səssizlik
Vətənim
Atılmış
Göz yaşı və biganəlik
Örnək adamlar
Darıxıram, ana
Balaca vətənpərvər, cənnət bağçası və ağlayan ağaclar
İnsanı yoran nədir?
Nurlu insan
Qabarlı əllər, gözəl insan
Payız yağışı
