Asan seçimin müşkülü
Rövşən Ağayev
Azərbaycan toplumunun sosial şəbəkələrdəki Rusiya və Qərb müzakirələri göstərir ki, biz təhsil sistemində 30 illik iflasın ağır fəsadlarını yaşayırıq. Adamların düşüncəsinin, təfəkkürünün formalaşması, onun hansı dəyərləri seçməsi birbaşa təhsil sisteminə bağlıdır. Yalnız dünyəvi və yüksəkkeyfiyyətli təhsil sistemi cəmiyyəti doğru yola çıxara bilər.
Axı insan necə ona, övladlarına ləyaqətli və azad fərdlər kimi yaşamaq fürsəti təqdim edən mütərəqqi sistemə nifrət bəsləyə, onunla qul kimi davranan, ləyaqətli yaşamaq imkanlarını əlindən alan, avtoritar-oliqarx sistemin hökmranlığına əsaslanan siyasi rejimə dəstək verə bilər? Biz seçim qarşısında qalanda necə Finlandiyanı və ya Estoniyanı yox, Rusiyanı, Belarusu seçə bilərik?
Əsrarəngiz bir çiçək bağı və quru tikan kolları ilə əhatə olunan boz çöl seçimi qarşısında qalan adamın ikincini seçməsi izahedilməz patologiyadır. Bu, nökərin kor-koranə öz ağasını canından artıq sevməsinə bənzəyir.
Bizim üçün ölkələrin, toplumların adının heç bir əhəmiyyəti yoxdur, onların hansı coğrafiyada yerləşməsinin əhəmiyyəti heç yoxdur. Gərəkli olan budur – bu toplumlar, onların dövlətləri bəşəri dəyərləri özləri üçün yaşam tərzi seçib, ya onlardan imtina ediblər.
“Bəs filan ölkədə inqilab oldu, niyə demokratiya gəlmədi?” deyənlər elə danışır ki, guya demokratiya hazır plovdur, hərə bir nimçə yeyən kimi ölkə demokratik olmalı imiş.
Yüz illər bataqlıq və cəhalət içərisində boğulmuş toplum üçün inqilab qollarındakı zəncirdən qurtulmaq üçün bir şans ola bilər. Bacaranlar 20-30 ilə təhsillərini inkişaf etdirəcək, institutlar quracaq, demokratikləşmə yoluna çıxacaq. Necə ki, Qərbdə qanlı inqilabların, gilyotinlərin nəticəsi 100-150 il sonra özünü göstərməyə başladı.
Bu gün dünyagörüşləri və təfəkkür arasında qanlı müharibə gedir. Ortada isə bir nəslin ömrü batır…
Müəllifin başqa yazıları:
İdxal azaldı: manat dinclik tapa bilərmi?
Büdcə: dəyişən nədir, dəyişməli olan nə?
Ucuz manat niyə ixraca yol açmır?
Zənginlərin pulunu necə saymalı?
Qalan 4 ayda manatı nə gözləyir?
Nazirin dedikləri və gerçəklik
Uşaq pulu təklifləri: çıxış yolu nədir?
Statistika islah edilməlidir. Kökündən
Böyük pullar kimlərin işinə yarayıb?
İslahat mübahisələri: gerçək islahatlar necə olur?
Artan maaşlar, dəyişən büdcə, cavabsız qalan suallar
İş yeri statistikasından doğan suallar
Avtomobil parkımız niyə köhnəlir?
