Rövşən Ağayev

Azərbaycanda elə ictimai əhəmiyyətli informasiyalar var ki, bizim üçün qara qutudur – heç nə öyrənə bilmirik. Belə məlumatlardan biri də evsiz adamların sayıdır. Ölkədə mənzilə ehtiyacı olan nə qədər insan var? Bu sualın rəsmi cavabı yoxdur.

Amma əldə olan rəsmi informasiyalar göstərir ki, bizdə əhalinin hər 1000 nəfərinə düşən mənzillərin sayı inkişaf etmiş ölkələrə nisbətən üç dəfəyə yaxın aşağıdır. Azərbaycanda həmin göstərici orta hesabla 188-dir, amma Avropada 400-600 intervalında dəyişir.

Ən maraqlı tərəfi odur ki, adını tikinti bumu qoyduğumuz 2005-2017-ci illərdə belə istifadəyə verilən mənzillərin sayı tələbatla müqayisədə çox aşağı olub. Bunu hansı fakta əsaslanıb deyirəm? Əhalinin artım sürəti hər vaxt mənzillərin artım sürətindən xeyli çox olub. Məsələn, 1995-2017-ci illərdə ölkə əhalisi 29%, mənzillərin sayı isə 21% artıb.

Yeri gəlmişkən, 1995-ci ildə əhalinin hər 1000 nəfərinə düşən mənzil sayı indiki ilə müqayisədə 19 ədəd çox olub (198 mənzil).

Başqa maraqlı məlumat budur ki, kənd yerlərində əhalinin hər 1000 nəfərinə 179, şəhərlərdə isə 204 mənzil düşür. Yəni şəhərlərdə təminat 14% çoxdur.

Rəsmi statistikaya görə, hazırda kəndlərdə 4,6 milyon nəfər yaşayır və 829 min mənzil var. 5,2 milyon nəfərin yaşadığı şəhərlərdə isə 1,1 milyon ədədə yaxın mənzil olduğu bildirilir.

Bir maraqlı fakt da odur ki, adambaşına mənzil sahəsinə görə ən aşağı göstərici Tərtərdə (14 kvadratmetr), ən yüksək Abşerondadır (24 kvadratmetr). Ən aşağı və ən yüksək göstərici arasında az qala iki dəfə fərq var.

Əslində mənzillə təminat səviyyəsi və evsizlərin sayı ölkədə gerçək yoxsulluq səviyyəsini də dəyərləndirmək baxımından çox önəmli göstəricilərdir.