Prezident İlham Əliyev şair, yazıçı-publisist, ictimai-siyasi xadim Sabir Rüstəmxanlını “Şöhrət” ordeni ilə təltif edib. Təltif Sabir Rüstəmxanlının Azərbaycanın ictimai-siyasi və mədəni həyatında uzunmüddətli səmərəli fəaliyyəti ilə əsaslandırılıb.

Mayın 20-də Sabir Rüstəmxanlının 75 yaşı tamam olur. 1946-cı il təvəllüdlü Sabir Rüstəmxanlı Azərbaycan Dövlət Universitetinin filologiya fakültəsini bitirib. “Ədəbiyyat və incəsənət” qəzetində müxbir, şöbə müdiri vəzifələrində çalışıb, “Yazıçı” nəşriyyatının, “Azərbaycan” qəzetinin (Qarabağa Xalq Yardımı Komitəsinin nəşri) baş redaktoru olub. 1991-1995-ci illərdə mətbuat və informasiya naziri postunu tutub.

Milli azadlıq hərəkatının öncül şəxslərindən olan Sabir Rüstəmxanlı 1992-ci ildən Vətəndaş Həmrəyliyi Partiyasının sədridir.

Filologiya elmləri doktorudur.

Sabir Rüstəmxanlı 1990-2015-cı illərdə parlamentin deputatı olub, 2020-ci ildən yenidən Milli Məclisdə təmsil edilir.