Koronavirusa yoluxan yazıçı Əlabbas hələ səhhətini bərpa edə bilməyib.

Novator.az saytının əməkdaşı ilə telefon söhbətində ovqatı gileyli, durumu halsız olan 63 yaşlı yazıçı çətinliklə də olsa danışa bilib və qısaca bəzi şikayətlərini çatdırıb: “Koronavirusa yoluxdum, bir çoxu kimi mənimlə də maraqlanan olmadı. Həkimlərdən, xəstəxanalardan şikayət edənləri və həkim biganəliyinin nə demək olduğunu artıq yaxşı anlayıram. Belə də xidmət olar?! Hətta məndə elə təəsurat yaranmışdı ki, o günlərdə xəstəxanaya düşsəydim, o basırıqda itib-batacaqdım.

Hansı saytı açırsan – ölüm xəbəri! Evdə taleyin ümidinə qalmış altı nəfərin ağır xəstəliklə ümidsiz mübarizəsinin nə demək olduğunu söyləməyə gərək yoxdur. Bir zəngimizə müsbət cavab verən olmadı, həkim üzü görmədik, hər tibb bacısı da korona olan evə getmir. Nəhayət, gec də olsa, ürəkli bir şəfqət bacısı tapıldı. Onda da dərmanlarla bağlı problemlər ortaya çıxdı. Lazım olan dərmanlar hər aptekdə tapılmır, tapılanlar da od qiymətinə.

Dövlət nəzarəti yoxdur. Pandemiya dövründə yeganə təsəllim Qələbəmiz və Şuşaya sancılan bayrağımız oldu. Xəstəlik xofu, ruh düşkünlüyü, stress və psixoloji basqını heç bir dava-dərman bunca əvəz edə bilməzdi ki, o elədi. Çox danışa bilməyəcəm. Özünüzü qoruyun”.

Oqtay Qorçu