Devid Rokefellerin “Memuarlar”ı azərbaycanca çap olunub
“Qanun” Nəşrlər Evi Devid Rokefellerin “Memuarlar” kitabını çap edib.
Əsəri Ruhiyyə Məmmədova tərcümə edib.
Kitabın satış qiyməti 11.90 manatdır.
XX əsrin ən nəhəng maliyyə və siyasət xadimlərindən biri, tanınmış amerikalı bankir, Rokefeller evinin başçısı olan Devid Rokefeller neft maqnatı, ilk milyonçu – “Standard Oil”in banisi Con D.Rokefellerin nəvəsidir.
Rokefeller ilk və nisbətən nüfuzlu qlobalizasiya və neokonservatizm ideoloqlarından biri, məşhur Bilderberq klubunun banisi kimi tanınıb.
Bilderberq klubunun yığıncaqlarından birində o, söyləyib: “Dünya müasir zəmanəmizdə dünya hökumətinə tərəf addımlamağa hazırdır. İntellektual elita ilə dünya bankirlərinin fövqəlmilli suverenliyi, şübhəsiz, ötən yüzilliklərdə tətbiq olunan milli özünükəşfdən daha üstün tutulur”.
Devid Rokefeller öz kitabında sözügedən “intellektual elita ilə dünya bankirlərinin suverenliyinin” yaranması, dünyada – Avropada, Asiyada, Afrikada və Latın Amerikasında maliyyə oliqarxiyasının təsirinin genişlənməsi kimi məsələlərdən bəhs edir. Dünya bankirlərinin ta Brejnevin dövründən başlayan Rusiyaya nüfuz etməsinə xüsusi diqqət çəkilir; Devid Rokefellerin Brejnevlə, Kosıginlə və bir sıra sovet liderləri ilə gizli danışıqlarının mətnləri təqdim olunur.
