Yeni nəşrlər
“Qanun” Nəşrlər Evinin çap etdiyi yeni kitablar haqda qısa məlumatları təqdim edirik.
Gül İrepoğlu, “İstanbul ulduzu” (Qeyri-adi bir almaz qeyri-adi həyatlara toxunarsa)
Gül İrəpoğlunun yeni əsəri – “İstanbul ulduzu” romanında əsrarəngiz bir almazın hekayəsi ətrafında demək olar ki, “bir almazın işığında Osmanlı tarixi” qələmə alınıb. Bu elə bir almazdır ki, daim hər tərəfə mavi işıq saçır. Və bu mavi işığın şöləsində Qanuninin bənzərsiz dəbilqəsindən II Əbdülhəmidin Parisdə satılan qiymətli daş-qaşlarına əsrlər, macəralar, iqtidar hərsliyi, ehtirasdan da üstün eşqlər, bağlılıqlar, xəyanətlər rəngərarəng təntənəli yürüyüşə çıxır.
Əsəri Lalə Qasımlı tərcümə edib.
Kitabın satış qiyməti 6.99 manatdır.
Jaklin Vilson, “Treysi Bikerin hekayəsi
Jaklin Vilson İngiltərə uşaq ədəbiyyatının ən məşhur yazıçılarından biridir. Onun əsərlərində əsasən valideynləri ayrılmış, övladlığa götürülmüş və ruhi xəstəlikdən əziyyət çəkən uşaqlardan bəhs edilir. Dörd əsəri, BBC-nin hazırladığı anketə əsasən, Birləşmiş Krallıqda oxunan yüz ən məşhur kitab siyahısına daxil olub.
Treysi Biker yazıçının ən çox sevilən obrazlarındandır. “Treysi Bikerin hekayəsi” əsərində Treysi və dostlarının uşaq evindəki macəralarından bəhs olunur. Treysi Biker obrazı qısa müddətdə o qədər məşhurlaşıb ki, onun haqqında serial, tamaşa çəkilib, kompüter oyunları hazırlanıb. Həmçinin üstündə Treysi Bikerin şəkli olan geyimlər, məktəb ləvazimatları uşaqlar arasında çox məşhurdur.
Əsəri Lalə İsmayılova tərcümə edib.
Kitabın satış qiyməti 6.49 manatdır.
Nərmin Salambəy “Oyanmaq vaxtıdır”
Heç kəs mükəmməl deyil. Hamının zəif cəhətləri var. Bir də özündən belə gizlətməyə çalışdığı qorxuları. Bəs bu qorxularla üzləşməyə cəsarətimiz çatırmı? Yoxsa onlar şüuraltının ən dərin qatlarında gizlənərək bizə necə davranmalı olduğumuzu diktə edir?
Aysun gənc və bacarıqlı iş xanımıdır. Bir gün gözlənilmədən qəribə hadisələrlə üzləşməyə başlayır. Bəs görəsən bu qorxu burulğanından çıxmaq ona müyəssər olacaqmı?
Kitabın satış qiyməti 5.00 manatdır.
“Mandala – çiçəklər və kəpənəklər” və “Mandala – hər yaş üçün boyama kitabı”
Bu iki kitab “Uşaq ədəbiyyatı” seriyasından nəşr olunub.
Hər kitabın satış qiyməti 4.99 manatdır.
