“Demokratiya dərsləri” və “Çöl”
“Qanun” Nəşrlər Evi Ataxan Əbilovun “Demokratiya dərsləri”, Anton Çexovun “Çöl” əsərlərini kitab şəklində çap edib. Həmin kitablar haqda qısa məlumatları oxucuların diqqətinə çatdırırıq.
Ataxan Əbilov, “Demokratiya dərsləri”
Kitabda cəmiyyət idarəçiliyi və onun ayrı-ayrı tərəfləri ilə bağlı demokratiya məsələlərindən bəhs edilir. Topluda müəllifin mühacirətdə yaşadığı dövrdə sözügedən mövzu ətrafında yazdığı məqalələr, müxtəlif tədbirlərdə etdiyi çıxışlar və kütləvi informasiya vasitələrinə verdiyi müsahibələr əksini tapıb.
Kitabda demokratiya, insan hüquq və azadlıqları, dövlət, hüquqi dövlət, hökumət, vətəndaşlıq anlayışları və s. bu kimi nəzəri məsələlərlə yanaşı, Azərbaycanda insan hüquqlarının praktik vəziyyətinə aid konkret hallar və eyni zamanda sosial dövlət olaraq Niderlandda təhsil, səhiyyə, dövlət və vətəndaş münasibətlərinin ayrı-ayrı tərəfləri barədə məlumat verilir.
Kitabdan siyasətçilər, hüquq müdafiəçiləri, aidiyyəti mütəxəssislər, tələbələr və bu mövzu ilə maraqlanan hər bir şəxs faydalana bilər.
Kitabın satış qiyməti 12.90 manatdır.
Anton Çexov, “Çöl”
“Çöl” Anton Çexovun maraqlı hekayələrindən biridir. Tənqidçilərin dediyi kimi, bu hekayə yazıçıya kiçik hekayələrdən böyük ədəbiyyata yol açan bir dönüş nöqtəsi idi. Əsas personaj doqquz yaşlı bir oğlan Yeqoruşka ‒ doğma kəndi ilə vidalaşır və anasının təkidi ilə gimnaziyada oxumaq üçün böyük bir şəhərə gedir.
Yolda oğlan gözəl təbiətli Dranitskaya, alçaldılmış yəhudi ailələri, varlı tacir Varlamov kimi rus ruhunun dərinliyini anlamağa imkan verən bir çox yeni insanla tanış olur.
Hekayədə çölün təsviri böyük bir yer tutur, ildırım fırtınası səhnəsindəki təsvirlər isə ustalıqla əks olunub.
Əsəri Etimad Başkeçid tərcümə edib.
Kitabın satış qiyməti 4.99 manatdır.
