“Yetimdoyduran” çıxıb
Gürcüstanda yaşayan azərbaycanlı şair İbrahimxəlilin “Yetimdoyduran” adlı yeni şeirlər kitabı işıq üzü görüb.
Kitab Tbilisinin “Saqa” nəşriyyatında çap olunub.
Kitaba müəllifin yeni yazıları, “Durna diasporu” silsiləsindən otuz beş şeiri və yenidən işlədiyi “İbrahim” rapsodiyası daxil edilib.
Mənəvi saflıq motivləri, şairin daxili dünya eniş-yoxuşları, inanmaq və sevmək qabarma-çəkilmələri, əbədiyyətə tənhalıq təmasları, hər an səmimi duyğular dövründə var olmaq istəyi-həsrəti kitabda vaqifanə xətt olaraq keçir.
Kitab Gürcüstan Yazıçılar Birliyinin tərkibində fəaliyyət göstərən Azərbaycan bölməsinin nəşridir.
Rəyçiləri Vaqif Bayatlı, Allahverdi Təhləli və Zahid Sarıtorpaq olan “Yetimdoyduran”ı kitabsevərlərin rəğbətlə qarşılayacağına ümid edirik.
