“Düşüncə tərzi”, “Pəri cadu”, “Dəyirmanın mühasirəsı” və…
“Qanun” Nəşrlər Evinin çap etdiyi yeni kitablar haqda qısa məlumatları oxucuların diqqətinə çatdırırıq.
Riçard E.Nisbett, “Düşüncə tərzi” (Ağıllı düşünmə vasitələri)
“Düşüncə tərzi” (“Mindware”) kitabı məşhur psixoloq Riçard E.Nisbettin ən çox satılan əsərlərindən biridir.
Kitabı tam psixoloji kateqoriyaya aid etmək doğru olmazdı, eyni zamanda fəlsəfə, psixologiya, iqtisadiyyat, elm tarixi və şüur fəlsəfəsi – koqnitiv elmlərə maraq göstərən hər kəsin oxuması tövsiyə edilən bir kitabdır.
Nisbett bu əsərdə psixoloji bəhsləri digər elmlərlə müqayisəli təhlil edərək, oxucuya sadə izahda aşılaya bilib.
Əsəri Bəhruz Əsədli tərcümə edib.
Kitabın satış qiyməti 13.90 manatdır.
Əbdürrəhimbəy Haqverdiyev, “Pəri cadu”
Mövzusu və süjeti xalq yaradıcılığından alınmış “Pəri cadu” pyesində əsasən ailə-məişət məsələsi həll edilir.
Real ailə münasibətlərinin, məişət səhnələrinin üstünlük təşkil etdiyi bu əsərdə simvolizm təsirləri, xəyali surətlər, səhnələr də var.
Ədib özü deyirdi ki, “Pəri cadu”nu simvolizmin təsiriylə yazıb.
“Pəri cadu”nun ideyası belədir: hər kəsin öz əlinin əməyi onun müqəddəratını təmin edir. İnsan taleyini kənarda yox, özündə axtarmalıdır.
Kitabın satış qiyməti 2.99 manatdır.
Emil Zolya, “Dəyirmanın mühasirəsı”
Emil Zolyanın bu əsəri 1870-1871-ci illər Fransa-Prussiya müharibəsinin dramatik epizodlarından biri haqqındadır.
Həmin müharibə öz yumruğunu dinc və zəhmətkeş
bir yer üzərinə qaldırmışdı. Merlye dayının fransız əsgərləri tərəfindən müdafiə
olunan dəyirmanı qalaya çevrilir. Amma müharibə dinc adamları silah götürməyə məcbur
edir.
“…O gözəl yay axşamı Merlye dayının dəyirmanında böyük bir təntənə vardı. Üç
stol həyətdə bir-birinin yanına bitişdirilib qonaqların intizarını çəkirdi.
Bütün mahal bu gün Merlyenin qızı Fransuaza ilə Dominikin nikahlanacağını
bilirdi. Dominik avara bir gənc idi, lakin buna baxmayaraq üç lyö uzaqlara qədər
mahalın bütün qadınları həsrətlə ona baxırdılar, – o bu qədər yaraşıqlı bir
oğlandı…”
Əsərin tərcüməçisi Ənvər Məmmədxanlıdır.
Kitabın satış qiyməti 2.99 manatdır.
Onore de Balzak, “Polkovnik Şaber”
Balzak yaradıcılığının mükəmməl nümunələrindən biri – “Polkovnik Şaber”.
Əsər hamının müharibədə ölmüş bildiyi zabit Şaberin ağrılı-acılı həyatından bəhs edir. Dəhşətli döyüşlərdə möcüzəvi şəkildə sağ qalmağı bacaran Şaber “ölü” qalmağı seçir. Çətinliklərlə vəkil Dervilin köməyi ilə itirdiklərini geri qaytarmaq istəyən Şaber var-dövlətini mənimsəyib başqasına ərə gedən arvadına diriliyini sübut edə bilmir.
Kitabın satış qiyməti 2.99 manatdır.
