“Həsrətindəyəm”in təqdimatı keçirilib
Saatlı rayonunda yazıçı Firuzə Davudqızının “Həsrətindəyəm” kitabının təqdimat mərasimi keçirilib.
Müəllifin sosial media meneceri Ayla İsgəndərli Novator.az-a bildirib ki, Firuzə Davudqızı həyat yoldaşının sağlamlığı ilə əlaqədar tədbirdə iştirak edə bilməyib: “Biz onun dərin minnətdarlığını təqdimatda iştirak edənlərə çatdırdıq. Təqdimat mərasimi Saatlı Tarix-Diyarşünaslıq Muzeyində təşkil olunmuşdu. Tədbirdə çıxış edən rayon ziyalıları, yazıçılar və ictimaiyyət nümayəndələri Saatlıda belə istedadlı, güclü qələmə sahib bir xanımın olmasından məmnunluq duyduqlarını və Firuzə xanımın bu yolda daha çox uğurlar əldə edəcəyinə əminliklərini vurğuladılar. Eyni zamanda qeyd etdilər ki, bu, bölgələrdə çox istedadlı və dəyərli xanımlarımızın, gənclərimizin olduğuna bariz nümunədir. Bildirildi ki, biz belə istedadları üzə çıxarmaq üçün əlimizdən gələni etməliyik”.
“Həsrətindəyəm” kitabının Sabirabad, Hacıqabul və Şirvan şəhərlərində də təqdimatı keçiriləcək.
“Həsrətindəyəm” povesti bu yaxınlarda kitab şəklində çap olunub. “MM-S” müəssisəsində işıq üzü görən 300 səhifəlik kitabda oxucuların əsər haqda ifadə etdiyi bəzi fikirlər də təqdim olunub.
Kitabın redaktoru və “Ön söz əvəzi”nin müəllifi Azərbaycan Jurnalistlər Birliyinin üzvü Qalib Bayramdır.
“Həsrətindəyəm”in süjet xətti zorla qaçırılan gənc bir qızın taleyi üzərində qurulub. Əsərdəki hadisələr ailə-məişət çərçivəsində cərəyan etsə də, daşıdığı ideya-məzmun yükü ümumbəşəri istəkləri, duyğuları ehtiva edir. Sevgi, qarşılıqlı anlaşma, mehriban ailə, sakit və firavan həyat arzuları əsərin qayəsini təşkil edir.
