Avropa Məhkəməsindən Qubad İbadoğlu sualları
Avropa İnsan Hüquqları Məhkəməsi məhbus iqtisadçı alim, siyasətçi Qubad İbadoğlunun vəkillərinin müraciətini nəzərə alaraq müvəqqəti xarakterli tədbirlərə başlayıb. Novator.az-ın məlumatına görə, Azərbaycan dövlətinə Qubad İbadoğlunun saxlanma şəraiti və səhhəti ilə bağlı suallar göndərilib, cavab istənib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
Qubad İbadoğlu London İqtisadiyyat Məktəbinin professoru, Azərbaycan Demokratiya və Rifah Partiyasının sədridir. Onu iyulun 23-də Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi tutub. Məlumata görə, Türkiyədə terrorçu şəbəkə sayılan FETÖ-yə bağlı şəxslərə qarşı əməliyyat tədbirlərində tutulan Anar Əliyev Qubad İbadoğlunun ona dollar verdiyini iddia edib. Bakıda Qubad İbadoğlunun adına olan mənzildə axtarış zamanı bir hissəsi saxta olan 40 min dollar aşkarlandığı bildirilir. Qubad İbadoğlu Anar Əliyevi tanımadığını, mənzildən çıxan pulun ona məxsus olmadığını deyir.
İyulun 24-də Nərimanov Rayon Məhkəməsi Qubad İbadoğlu barəsində 3 ay 26 günlük həbs qətimkan tədbiri seçib. İstintaq mütəşəkkil dəstənin saxta xarici valyuta hazırlaması, əldə etməsi, satması ittihamı ilə başlayıb, avqustun 25-də işə dini ekstremist materialları hazırlama, saxlama və ya yayma ittihamı da əlavə olunub.
Bakı İstintaq Təcridxanasında saxlanan Qubad İbadoğlu hipertoniya, şah damarın genişlənməsi və şəkərli diabetdən əziyyət çəkir, həbsdə səhhəti ağırlaşıb. Vəkilləri və yaxınları onun həbsdən buraxılması, müayinə və müalicəsinin təşkilinə çalışır, amma bu yöndə cəhdlər nəticəsiz qalır.
Qubad İbadoğlu hansı maddə ilə şübhəli bilinir?
“Hakimiyyətdəkilər səhvən düşünə bilər ki…”
Qubad İbadoğlu: iddialar üzə çıxır
Qubad İbadoğlu 4 aylıq həbsə getdi
Qubad İbadoğlu: müdafiə komitəsi yaradıldı
Vəkil Qubad İbadoğlu ilə görüşə bilməyib
Qubad İbadoğlu yenə həbsdə saxlandı
Qubad İbadoğlunun səhhəti pisləşir
Qubad İbadoğlu: cinayət işi böyüyür
