“O isə dəlisov-dəcəl bir uşaq…”
Sentyabrın 1-i şair Ələkbər Salahzadənin xatirə günüdür.
Məmmədsalahlı Ələkbər Baba oğlu 1941-ci il martın 15-də Qonaqkənd (indiki Quba) rayonunun Cimi kəndində anadan olub. Orta təhsilini kənddə, ali təhsilini indiki Bakı Dövlət Universitetində alıb. Ədəbi fəaliyyətə orta məktəbdə oxuduğu illərdən başlayıb, illər keçdikcə dövri mətbuatda çıxış edib. “Azərbaycan” jurnalının ədəbi işçisi, “Tərcürmə saatı” radio jurnalının redaktoru olub. Azərbaycan Sovet Ensiklopediyasının dil, ədəbiyyat, incəsənət redaksiyasında elmi redaktor, “Gənclik” nəşriyyatında tərcüməçi, sonra poeziya üzrə redaktor, Azərbaycan Yazıçılar İttifaqında Bədii Ədəbiyyatın Təbliği Bürosunun direktor müavini işləyib. Sonra “Ulduz” jurnalında poeziya şöbəsinin müdiri, jurnalın redaktoru vəzifələrində çalışıb. 2004-cü ildən ömrünün sonunadək “Qobustan” jurnalının baş redaktoru olub.
“Beş yarpaq”, “Od hevkəli”, “Gözlər baxır dünyaya”, “Xatirə çiçəyi”, “Yerimiz bir, göyümüz bir”, “Od odası”, “Yanıltmaclı əlifba”, “Xocalı xəcilləri”, “Vaxt vadisi”, “Mikayıl Müşfiqin monoloqu”, “Qobustan” və başqa kitabların müəllifidir. Bədii tərcümə ilə də ardıcıl məşğul olub. Əsərləri xarici ölkə xalqlarının dillərinə çevrilib. 100-dən çox essesi, məqaləsi işıq üzü görüb. Radio-pyeslər, 20-dən artıq uşaq nağılı yazıb. Pyesləri Sumqayıt, Şəki, Ağdam dram teatrlarında tamaşaya qoyulub.
Ələkbər Salahzadə 2013-cü ilin sentyabr ayının 1-də Bakıda vəfat edib.
Novator.az şair Səfər Rzasoylunun Ələkbər Salahzadənin xatirəsinə həsr etdiyi “Cənnət” şeirini oxucuların diqqətinə çatdırır.
CƏNNƏT
Ələkbər Salahzadənin xatirəsinə
Çiçək qoxusundan, ulduz sayından
Sükut yelləncəyi hörmüşdü Tanrı.
Sükut yelləncəyi yırğalanırdı –
Gecədən uzaqda yatırdı hamı.
Ağzına su alıb susurdu çay da,
Nə yarpaq dinirdi, nə bir xatirə…
Azıb yarısını yarımcan Ay da
Qonub bir ağaca baxırdı yerə.
O isə dəlisov-dəcəl bir uşaq
Onunçun bəlkə də Cecə pəncərə?!
Tullanıb getmişdi sözdən də uzaq –
Hər anın ilk sevgi olduğu yerə!
Səfər Rzasoylu
