Energetika Nazirliyinin 7 iyul məlumatına görə, “AzəriLayt” markalı Azərbaycan neftinin barreli 44,36 dollara satılır.

London birjasında brent markalı neftin barrelinin 42,80 dollara, Nyu-York birjasında layt markalı neftin barrelinin 40,32 dollara təklif olunduğu bildirilir.

Azərbaycanın 2020-ci il büdcəsində bir barrel neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43, maya 22,92, iyuna 38,14, iyula 43,02 dollarla başlayıb.

İl ərzində ən aşağı qiymət aprelin 21-də qeydə alınıb: 15,81 dollar.

Novator.az-ın məlumatına görə, iyulun 6-da Azərbaycan Televiziyasına, İctimai Televiziyaya və “Xəzər” Televiziyasına müsahibə verən prezident İlham Əliyev deyib ki, dünya bazarlarında neftin qiymətinin kəskin düşməsinə baxmayaraq 2020-ci ilin ilk altı ayı ərzində ölkənin valyuta ehtiyatları cəmi 98 milyon dollar azalıb: “Biz daha da böyük düşmə, tənəzzül gözləyirdik. Büdcəmizdə neftin qiyməti 55 dollar hesablanıb, altı ay ərzində neftin orta qiyməti 38 dollar olub. Bu, böyük itkidir. Bəzi günlərdə daha aşağı düşürdü. Amma neftin qiyməti hətta 14 dollar da olsa, biz ayaqda duracağıq. Biz son illər ərzində o qədər böyük iqtisadi-maliyyə potensialı yaratmışıq ki, istənilən böhranla bacara biləcəyik”.

Bu il neft koronavirus pandemiyasının yaratdığı iqtisadi qapanmalar üzündən kəskin ucuzlaşıb. Aprelin 12-də iri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) gündəlik hasilatı mərhələlərlə azaltmaq razılığına gəliblər.

Beynəlxalq razılaşmaya görə, 2020-ci ilin may-iyul aylarında Azərbaycan gündəlik neft hasilatı 554 min barrel, iyuldan sonra 587 min barrel, 2021-ci ilin yanvar ayından 620 min barrel olmalıdır.