Yeni nəşrlər
“Qanun” Nəşrlər Evinin çap etdiyi yeni kitablar haqda qısa məlumatları təqdim edirik.
Jorji Amadu, “Möcüzələr dükanı”
“Möcüzələr dükanı”nda həqiqətən möcüzəli bir aləmə düşürsən. Hər dəqiqə möcüzə. Hər addımda möcüzə… Amadunun bir çox romanlarında olduğu kimi, “Möcüzələr dükanı”nda da ədalətsevər, azadlığa can atan xalqın natamamlıq kompleksi, azad təbiəti burjua mühitinə və burjua dünyagörüşünə qarşı qoyulur.
Lakin başqa əsərlərindən fərqli olaraq, yazıçının bu romanında həmin qarşıdurma öz zirvəsinə çatır. Adama elə gəlir ki, böyük sənətkar “Möcüzələr dükanı”nı öz içindəki bəzi mətləbləri aydınlaşdırmaq üçün yazıb.
Əsəri İlqar Əlfioğlu tərcümə edib.
Kitabın satış qiyməti 10.99 manatdır.
Culiya Enders, “Füsunkar bağırsaq” (Lazimi dəyər verilməyən orqan haqqında hər şey)
Bu kitabda barəsində insanlar arasında danışılması xoş olmayan, çox vaxt kölgədə qalan, amma çox vacib məsələlərə toxunulur: mədə, bağırsaq, həzm, həzm prosesinin işi, həzmin əhval-ruhiyyəmizə təsiri və s.
Həmçinin kitabda tabu mövzusu olan böyük bayıra çıxmanın düzgün qaydalarından və bu qaydalara riayət olunmasının insan sağlamlığına necə müsbət təsir göstərməsindən danışılır.
Bütün bunlar elə bir elmi-bədii üslubda verilir ki, kitabı oxuduqca insan həm zövq alır, həm də elmi bilgilərə yiyələnir.
Kitab tibb sahəsində oxuyan tələbələr üçün əhəmiyyətli olmaqla yanaşı, eyni zamanda bütün insanlar üçün faydalıdır, çünki hər bir insan öz sağlamlığının qeydinə özü qalmalıdır və bu kitabda da bununla bağlı dəyərli elmi məsləhətlər yer alır.
Kitabı alman dilindən Murad Muradov tərcümə edib.
Kitabın satış qiyməti 9.99 manatdır.
