Yeni kitablar
“Qanun” Nəşrlər Evinin çap etdiyi yeni kitablardan bir neçəsi haqda məlumatları oxucuların diqqətinə çatdırırıq.
Pamela Drukerman, “Uşağınızı fransız kimi böyüdün” (Amerikalı bir ana nfransızların uşaq böyütmə üsullarını kəşf edir)
Körpələriniz gecə yaxşı yatmır, qonaqlıqda, orada-burada dəcəllik edir, yeməyini yemir və həyatınızı cəhənnəmə çevirirlərsə, əmin olun, siz tək deyilsiniz! Körpəsi olan bütün valideynlərin bunu yaşamalı olduğunu düşünürsünüzsə, bir daha götür-qoy edin.
Amerikalı ana Pamela da Fransaya köçənə qədər belə düşünürdü. Lakin o, Fransadakı restoranlarda uşaqların ağlamadığını, valideynləri ilə eyni şeyləri yediyini, gecələr yuxudan oyanmadığını, ata-analarına qulaq asdığını görəndə bunun sirrini öyrənmək qərarına gəlir və bu məlumatlandırıcı və əyləncəli kitabı yazır. Siz də uşağınızı fransız kimi böyüdün və həyatdan zövq alın!
Amerikalı yazıçı və jurnalist Pamela Drukerman 1970-ci ildə doğulub. Hazırda ailəsilə birlikdə Fransada yaşayır.
Kitabı Lalə İsmayılova tərcümə edib.
Kitabın satış qiyməti 10.90 manatdır.
Nil Geyman, “Qəbiristanlıq kitabı”
“Qəbiristanlıq kitabı” yeni çağ ədəbiyyatında Nil Geymana məxsus şedevr əsərlərdəndir. Maraqlı süjet xətti ilə seçilir: qəbiristanlıq yaxınlığında yaşayan bir ailəni Cek adlı şəxs öldürür. Yalnız beşikdə qalan oğlan uşağı qurtulur. Bu uşağa qəbiristanlıqda yaşayan ruh ailəsi və vampirlər baxmağa başlayır. Ruhlar oğlanın valideynlərinin qatilinin sağ olduğunu bildiyi üçün onu qəbiristanlıqdan kənara buraxmır.
Oğlan böyüdükdən sonra valideynlərinin qətlinin əslində qatillərdən ibarət orden tərəfindən törədildiyini öyrənir. Əsərdə həyəcanlı anlar da elə bundan sonra başlayır.
Əsəri Əli Nəcəfxanlı tərcümə edib.
Kitabın satış qiyməti 9.99 manatdır.
İlham Məmmədov, “Vüqar / Alim / On Yeddi” (roman)
Müəllif İlham Məmmədov kitabını
oxuculara belə təqdim edir: “Vüqar – Alim – On Yeddi”. Bu ad və ləqəblər
romanımın qəhrəmanı olan gənc oğlana məxsusdur. Mənim yazdığım bu roman,
aldadılaraq radikal dini cərəyanlara qoşulan, gəncin faciəli həyatından bəhs
edir.
Eşq və məhəbbət insan həyatında çox böyük təsir gücünə malikdir. Məhəbbətin xəyanətini
görən qəhrəmanımın, qisas hissi sayəsində, öz həyatı ilə yanaşı, valideynlərinin
də həyatını fəlakətə sürüklədiyini göstərməyə çalışmışam.
Yazdıqlarımla mən islam dinini nə tərif, nə təhqir etmişəm. Böyük dövlətlərin və onların xüsusi xidmət orqanlarının müsəlman ölkələrində, torpaqlarında yaratdığı müharibələrdəki əsas məqsədlərini oxucuya çatdırmaq istəmişəm”.
Kitabın satış qiyməti 10 manatdır.
Nikola Tesla, “İcadları və elmi ixtiraları məktəblilər üçün liderlik dərsləri”
O, bəşəriyyətə elektrik enerjisi və yüzlərlə faydalı elmi-texniki yenilik bəxş etdi… Bu sirli alim kimdir? Amerika Elmlər Akademiyasının tərtib etdiyi reytinqə görə, Nikola Tesla bəşəriyyətin ən böyük beş ixtiraçısından biridir.
Napoleonun “Dahi insanlar öz əsrini işıqlandırmaq üçün yanmağa çağırılmış meteorlardır” ifadəsi qeyd-şərtsiz bu parlaq şəxsiyyətə tətbiq edilə bilər.
Kitabı Ruhiyyə Məmmədova tərcümə edib.
Kitabın satış qiyməti 3.99 manatdır.
