“Vəba günlərində eşq”, “Ruhu qidalandıran toyuq şorbası” və…
“Qanun” Nəşrlər Evində çapdan çıxmış “Vəba günlərində eşq” və “Ruhu qidalandıran toyuq şorbası” kitabları haqda qısa məlumatları təqdim edirik.
Qabriel Qarsia Markes, “Vəba günlərində eşq”
Nobel mükafatçısı Qabriel Qarsia Markesin “Vəba günlərində eşq” romanı gənc teleqrafçı Florentina Arisa və varlı ailədən olan gözəl Fermina Dasanın məhəbbəti haqqındadır. Əsərin qəhrəmanı Florentina Ferminaya əbədi məhəbbət bəxş edəcəyini desə də, o daha imkanlı şəxsə – doktor Xuvenal Urbinoya ərə gedir. Bu evlilikdə Ferminanın atasının da böyük rolu olur. O, kasıb teleqrafçının yox, tanınmış həkimin qayınatası olmağı üstün tutur. Bunun üçün bir çox əziyyətlərə qatlaşaraq xoşluqla olmasa da, qızını yolundan döndərə bilir.
Ancaq bütün çətinliklərə, qadağalara baxmayaraq Florentina öz məhəbbətindən bir addım da geri çəkilmir və sevgilisinə qovuşacağı günə olan inamı onu heç vaxt tərk etmir.
Ağrı-acılar, təsadüfi eşqlərlə dolu zaman keçir və Florentina da varlı, cəmiyyətin hörmət etdiyi şəxs olur. Və düz 51 il 9 ay 4 gündən sonra sevgisinə – illərlə həsrətini çəkdiyi Ferminasına qovuşur. Bununçün o, səbirlə doktorun ölümünü gözləyir.
Əsəri türkcədən Əziz Rzazadə tərcümə edib.
Kitabın satış qiyməti 9.99 manatdır.
Cek Kenfild, Mark Hansen, Emi Nyumark, “Ruhu qidalandıran toyuq şorbası” (101 ibrətamiz əhvalat)
Uşaq vaxtı xəstələnəndə nənəniz sizə toyuq şorbası verirdi. Bu gün sizin ruhi qidaya və qayğıya ehtiyacınız var. “Toyuq şorbası”ndan kiçik əhvalatlar sizin mənəvi yaralarınızı sağaldacaq, ruhunuzu möhkəmlədəcək, xəyallarınızı yenidən qanadlandıracaq və ən böyük xoşbəxtliyin – bölüşmək və sevməyin sirrini açacaq.
Sadə ailədən olan balaca oğlan üç prezidentlə tanış olur. Tənha ana Arzular Kitabı açır – və bundan sonra onun bütün arzuları həyata keçir. Uğursuz aktrisa onda… xərçəng xəstəliyi olduğunu biləndən sonra həqiqi xoşbəxtlik əldə edir. Şəhərin ən gözəl qızı iki frazadan sonra qozbelə aşiq olur. Müəllimə dərs demək əvəzinə dəfn mərasimi təşkil edir. 13 yaşlı qız anasının arzusunu həyata keçirmək üçün 45.526 qutu peçenye satır.
Kitabda toplanmış bu əhvalatları və daha 95 valehedici əhvalatı birnəfəsə oxuyacaqsınız.
Kitabı Oqtay Kazımov və Araz Gündüz tərcümə ediblər.
Kitabın satış qiyməti 10.90 manatdır.
Den Braun, “Da Vinçi şifrəsi” (təkrar nəşr)
Leonardo da Vinçi işlərində gizli şifrələr var… Yalnız bu, ağlasığmaz hakimiyyət və qüdrət bəxş edən xristian ziyarətgahlarını tapmağa kömək edər… Bəşəriyyətin əsrlərlə öyrənməyə can atdığı böyük sirrin açarı bəlkə də tapıldı… Müəllif “Da Vinçi şifrəsi” romanı üzərində işləyərkən, apardığı tədqiqatların bütün nəticələrini baş qəhrəmanı, din tarixi və ikonoqrafiya üzrə Harvard Universitetinin professoru Robert Lenqdonun vasitəsilə oxuculara çatdırır.
Kitabın satış qiyməti 12.99 manatdır.
