Yeni kitablar
“Qanun” Nəşrlər Evinin çap etdiyi yeni kitablar haqda məlumatları oxucuların diqqətinə çatdırırıq.
Toni Robbins, “İçindəki divi oyat”
Dünya şöhrətli Amerika yazıçısı və filosofu Antoni Robbinsin təqdim olunmuş bu kitabı, çox güman ki, sizdə dərin maraq oyadacaq, yaşam fəlsəfəsinə dair sizə geniş məlumat verəcək. Uşaqlıq çağlarını uğursuz, kasıb ailədə yaşamış, heç bir ali təhsili olmayan, yalnız həyati müşahidələrinə arxalanıb daxili gücünə üz tutaraq şöhrət qazanmış bir adamın həyat hekayələrini maraqla qarşılayacaqsınız.
Kitabda yaşamağa belə ümidini itirmiş insanlara ruhdan düşmədən öz daxilində uyuyan nəhəng gücü oyatmağın, yaşamaq üçün pul, biznesdə isə uğur qazanmağın yolu göstərilir, beləcə gələcəyə inam gücləndirilir. Müəllifin tövsiyələri nəticəsində həyatın çətinliklərinə davam gətirməyən, yaşamağa ümidini itirmiş adamlar həyatlarını yenidən qurmağı bacarmış, yaşadıqları cəmiyyətin layiqli vətəndaşına çevrilmişlər.
İnanırıq ki, Robbinsin təklif etdiyi metodlar heç vaxt köhnəlməyəcək, çıxılmaz vəziyyətlə üzləşmiş insanların yaşamağa olan inamın gücləndirilməsi yolunda əvəzsiz məsləhət xarakteri kimi yadda qalacaq.
Kitabın satış qiyməti 19.90 manatdır.
Suzan Kollinz, “Zığ-zığ quşu”
Katnis Everden Kvartal oyunlarından da
sağ-salamat xilas oldu. Lakin onu gözləyən vəziyyət gözlədiyindən tamamilə fərqlidir:
12-ci Bölgə yerlə-yeksan edilib, Pita Kapitol tərəfindən əsir alınıb. Geyl onun
ailəsini vaxtında xilas edə bilib.
Katnis uzun müddətdir ki, inqilabla bağlı planlar qurulduğunu və özünün də
onun tərkib hissəsi olduğunu anlayır. İndi o, ona biçilən Zığ-zığ quşu rolunun
öhdəsindən lazımınca gəlməlidir. Bütün bölgələrin aqibəti onun atacağı
addımlardan asılıdır. Katnis heç vaxt olmadığı qədər güclü olmaq məcburiyyətindədir.
Kapitolu devirməyə, Panemin gələcəyini müsbətə doğru dəyişməyə və prezident
Snoudan intiqam almağa gedən yolda Katnis və yoldaşlarının keçəcəkləri çətin və
keşməkeşli yol bir növ növbəti Aclıq oyunlarını xatırladır. Lakin bu dəfə birdən
artıq şəxs qalib gələ bilər. Zığ-zığ quşunun başçılığı ilə misli görünməmiş bir
gücə çevrilən inqilab nəinki bölgələrdə, hətta Kapitolda şən, firavan həyat sürən
insanları da qısa müddətdə öz ağuşuna alacaq.
“Aclıq oyunları” trilogiyasının üçüncü hissəsi olan “Zığ-zığ quşu” Katnisin
inqilaba liderlik edəcəyi dövrdən bəhs edir. Bu dəfə o yalnız özünü deyil,
bütün Panemi xilas etməlidir. Suzan Kollinz trilogiyanın sonuncu hissəsində həyəcan
və gərginliyi bir az da artırır.
Əsəri Xülya Cəfərova tərcümə edib.
Kitabın satış qiyməti 14.90 manatdır.
Suzan Kollinz, “Və alov doğacaq”
Bütün çətinliklərə rəğmən Katnis Aclıq oyunlarının qalibi oldu. O və 12-ci Bölgədən olan xərac həmkarı Pita Mellark möcüzə nəticəsində sağ qaldılar. Katnis artıq özünü rahat, hətta xoşbəxt hiss etməlidir. Bütün bunlardan sonra o, ailəsinin və yaxın dostu Geylin yanına qayıdıb. Lakin hələ ki, heç nə Katnisin arzuladığı kimi getmir. Geyl onunla soyuq və məsafəli davranır. Pita ondan tamamilə üz çevirib. Və Kapitola qarşı üsyan qalxması barədə söz-söhbət gəzir – başlamasına Katnis və Pitanın təkan verdiyi bir üsyan.
Üstəlik, Katnis qarşısını ala bilmədiyi bir narahatlıq keçirir. Onu ən çox qorxudan nə etməli olduğuna dəqiq qərar verə bilməməsidir. Katnis və Pitanın Kapitolun qəddar Zəfər Dövrəsi çərçivəsində Bölgələrə edəcəkləri səfər yaxınlaşdıqca vəziyyət daha da gərginləşir. Əgər onlar heç bir şübhə yeri qoymadan bir-birlərini dəli kimi sevdiklərini sübuta yetirə bilməsələr, nəticəsi dəhşətli olacaq.
“Aclıq oyunları” trilogiyasının ikinci hissəsi olan “Və alov doğacaq”da Suzan Kollinz Katnis Everdenin hekayəsini davam etdirir. Onu heç vaxt qarşılaşmadığı sınaqlara çəkir… və hər gedişatda oxucunu bir az da əəccübləndirir.
Əsəri Xülya Sabirli tərcümə edib.
Kitabın satış qiyməti 14.90 manatdır.
Jojo Moyes, “Həminki mən”
Bu kitab Luiza Klarkın Nyu-Yorkdakı həyatından bəhs edir. O, Semlə tanış olandan sonra iş arxasınca Nyu-Yorka gedir. İlk günlər hər şey ürəyincə olur. Aqnes adlı qadının köməkçisi işləyir, onunla birgə maraqlı tədbirlərdə iştirak edir.
Sonra hər şey qəflətən dəyişir. Aqnesin səhvi ucbatından Luiza işdən qovulur. Onun çətin günləri başlayır. Qalmağa yeri, işi olmur. Günlərlə küçələri dolaşıb iş axtarır, tanışının mənzilində gecələyir. Bir gün bəxti üzünə gülür. Qonşuluqda yaşayan yaşlı bir qadının itini küçədə görür. İti götürüb həmin qadının mənzilinə gedəndə məlum olur ki, qadın yıxılıb, onu xəstəxanaya aparmalı olur. Bundan sonra həmin qadının evində yaşayır.
Sevdiyi Semdən ayrılır. Ona elə gəlir ki, Sem heç də onu başa düşmür. Gec də olsa Luiza Klark özünü kəşf edir. Arzularını həyata keçirir. Semi daha yaxından tanıyır. Həyəcanlı anlar yaşayır. Gec də olsa Semi seçməkdə yanılmadığını başa düşür.
Əsəri Sevil Gültən tərcümə edib.
Kitabın satış qiyməti 14.90 manatdır.
Lev Tolstoy, “Hərb və sülh”
Dünya ədəbiyyatında özünəməxsus yeri olan məşhur rus yazıçısı L.N.Tolstoyun 1804-1807 və 1812-1813-cü illər rus-fransız müharibələrinə həsr olunmuş “Hərb və sülh” romanında ədibin bədii dühasının xəlqiliyi tam vüsətlə öz əksini tapıb.
Bu roman vətənpərvərlik pafosu, xalqın tarixdə həlledici rolunu təsdiqləyən sosial-fəlsəfi məzmunu, yüksək bədii dili, epik-təhkiyə üslubu, kompozisiyanın çoxplanlılığı, psixoloji təhlilin dərinliyi, insan xarakterlərinin dolğunluğu və s. keyfiyyətləri ilə XIX əsr dünya realist nəsrinin zirvələrindən sayılır.
Əsəri Məmməd Arif və Beydulla Musayev tərcümə ediblər.
Kitabın satış qiyməti 15.40 manatdır.
Toni Morrison, “Solomon nəğməsi”
Qaradərili olsa da, imkanlı ailədə dünyaya göz açan və tamahkar atasının, sevgidən məhrum anasının himayəsində “yağ içində böyrək kimi” böyüyən, həmyaşıdlarından fərqli həyat sürən Südəmərin ərköyünlüyü get-gedə harınlığa çevrilir… Və xəyalındakı qızıl sorağıyla evlərindən xeyli uzaqlara – dədə-baba yurduna üz tutur. Burada isə gözləmədiyi halda, öz əcdadlarının izlərini aşkarlayır…
Heç demə, Amerikanın ayrı-ayrı ştatları da, şəhər-qəsəbələri də, dağ-dərələri də elə onun ulu baba-nənələrinin, mənsub olduğu nəsil-qəbilənin, torpağın adını daşıyırmış… Beləcə, geriyə qızıldan da qiymətli sərvətlə – əcdadları haqqında xatirələr və zatı-kökü haqqında ilginc həqiqətlərlə dönür… Bu onun həyatını büsbütün dəyişir… Və daha çox gerçəkliyə qovuşmaq – gec də olsa, öz kökünə qayıtmaq, əski nəsil-nəcabətinə tapınmaqdan ötrü özünü mövcud ab-havanın ağuşuna atır – həyatı yarıda qırılacaqsa belə… “Çünki o, artıq bilirdi – Şalimarın bildiyini dərk edirdi, Solomonun qayəsini əxz edirdi – yetər ki, özünü havanın ağuşuna verəsən, onda onu fəth edə bilərsən!”
Əsəri Azər Əhmədov tərcümə edib.
Kitabın satış qiyməti 15.90 manatdır.
Viktor Hüqo, “Gülən adam”
Böyük fransız şairi, yazıçısı və
dramaturqu Viktor Hüqonun bütün əsərləri romantizmin şəfəqinə bürünüb. «Gülən
adam» romanını Hüqo siyasi düşüncələrinə görə sürgün edildiyi Channel
adalarında 15 ay ərzində yazmışdır.
«Gülən adam» romanında yazıçı öz qəhrəmanı Quinplenin uşaq vaxtı oğurlanmasını,
quldurlar tərəfindən eybəcər hala salınmasını və yarmarka aktyorluğundan
parlamentdə lord vəzifəsinə oturmasını təqib edir.
Tərcüməçi: Ramiz Babayev
Kitabın satış qiyməti 14.90 manatdır.
Co Nesbo, “Bəbir”
Qatil kimdir? Co Nesbonun “Bəbir” romanında bu sualın cavabı axtarılır. Yazıçı bütün roman boyu müxtəlif detallarla ona işarə verir, amma son ana qədər sualı açıq qoyaraq oxucunu intizarda saxlaya bilir.
“Bəbir”də silsilə qətllər törədən qatilin axtarışına çıxmış kriminalistin həyatı, iş prosesi, yaşadığı psixoloji, mənəvi sarsıntıların öhdəsindən gəlmək üçün apardığı mübarizə, keçmiş sevgilisinin xatirələri ilə həmkarı Kayyanın sevgisi arasında çapalaması təsvir olunur. Onun axtarış zamanı keçdiyi yollar, tapdığı izlər, apardığı təhlillər maraqlı bir şəkildə qələmə alınıb. Kriminalistin izlədiyi qatil hər dəfə bir addım öndədir. Harri Holenin bütün səylərinə baxmayaraq… Səbəbi nədir? Bununla romanı oxuyarkən tanış olacaqsınız.
Kitabın satış qiyməti 19.90 manatdır.
Artur Heyli, “Aeroport”
Müasir Amerika yazıçısı Artur Heylinin “Aeroport” romanı 1968-ci ildə ABŞ ədəbiyyatının ən yaxşı romanı hesab edilib. Müəllif özünəməxsus dinamik tərzdə aeroport və onun öz ətrafında birləşdirdiyi müxtəlif adamların ehtiyaclarını, istək və arzularını, məhrumiyyətlərini, acı talelərini oxucusuna təqdim edir. Müasir aeroportdakı qarışıqlıq əslində bugünkü ABŞ-ın bədii modeli kimi verilir.
Əsəri Zeydulla Ağayev tərcümə edib.
Kitabın satış qiyməti 14.90 manatdır.
Benjamin Spok, “Uşaq və ona qulluq”
Əziz valideynlər! çoxunuzun lazım
olduqda həkimə müraciət etmək imkanınız vardır. Həkim uşağınıza bələddir, odur
ki, ən yaxşı məsləhəti də sizə ancaq o verə bilər. Bəzən ona ötəri bir baxış və
bir-iki sual vermək kifayətdir ki, körpənizə nə olduğunu başa düşsün.
Bu kitab diaqnoz qoymaq və ya müstəqil müalicə etmək yollarını öyrətməyi nəzərdə
tutmur. Müəllif sizə yalnız uşaq və onun ehtiyacları barədə ümumi təsəvvür vermək
istəyir.
Düzdür, müstəsna hallarda həkimə gedə bilməyən valideynlərə kitabın bəzi fəsillərində
ilk yardım göstərmək barədə məsləhətlər verilir. Kitabın verdiyi məsləhət heç
bir məsləhətin olmamasından, əlbəttə, yaxşıdır. Lakin əsl tibb yardımı almaq
imkanı varsa, yalnız kitaba arxayın olmağına dəyməz.
Bir də onu qeyd etmək istəyirəm ki, bu kitabda yazılanların hamısını tam müstəqim
mənada başa düşmək lazım deyil. Çünki bir-birinə oxşayan uşaqlar olmadığı kimi,
bir-birinə bənzər valideynlər də yoxdur; hər uşaqda xəstəlik müxtəlif şəkildə
keçir; ayrı-ayrı ailələrdə tərbiyə formaları da cürbəcür olur. Mən ancaq
ümumi halları təsvir etməklə kifayətləndim. Bir də unutmayın ki, öz uşağınıza
yaxşı bələdsiniz, mən isə onun haqqında heç nə bilmirəm.
Əsəri Ayişə Tahirova tərcümə edib.
Kitabın satış qiyməti 19.99 manatdır.
Hakon Ovreas, “Qəhvəyi”
Rune adlı bir oğlan uşağı gün ərzində diqqəti heç nəylə çəkmir. Amma axşamlar o, heç nədən qorxmayan superqəhrəmana çevrilir. Əlində qəhvəyi boya və fırça gecələr evdən çıxıb özündən böyük oğlanların velosipedlərini rəngləyir.
Kitabın satış qiyməti 9.99 manatdır.
“Maşa və Ayı”
Kitabda dəcəl Maşa və xeyirxah Ayının macəraları haqqında ən yaxşı hekayələr toplanıb.Uşaqlar onun səhifələrində cizgi filminin sevimli qəhrəmanları ilə görüşəcəklər.
Bu şən hekayələr sizə hazırcavab olmağın, dostlara kömək etməyin və hər şeydə sevinc tapmağın əhəmiyyəti haqqında danışacaq.
Kitabın satış qiyməti 10.99 manatdır.
