Arif Hacılı
Müsavat Partiyasının başqanı

İnsanlıq öz tarixində bəlkə də ilk dəfədir ki, eyni vaxtda hamıya, dünyanın hər yerində yaşayan hər kəsə aid olan bəla ilə üzləşib.

Hətta İkinci Dünya müharibəsindən xəbərsiz olanlar, bu fəlakətdən kənarda qalan xalqlar, dövlətlər var idi.

Koronavirus fəlakəti hər kəsə, hər bir insan övladına aid olan bəlaya çevrildi.

İlk dəfədir ki, hər kəs özünə görə yox, yaxınlarına, obasına, kəndinə, şəhərinə, ölkəsinə, bəşəriyyətin gələcəyinə görə məsuliyyət daşıyır.

Hər gün minlərlə insan, həkim, digər tibb işçiləri, görəvini yerinə yetirən hər kəs, yaşlı qadınlar, ağsaqqallar kimlərinsə məsuliyyətsiz, cahil davranışlarının qurbanı olur.

Bu bir oyun deyil.

Hər kəs anlamalıdır ki, bəlkə də həyatımızın ən mühüm və məsuliyyətli dövrünü yaşayırıq.

Görəvimiz bəşəriyyəti, ölkəmizi, yaxınlarımızı, ailəmizi, özümüzü bu bəladan qorumaqdır.

Hakimiyyətə səslənirəm. Bu vəziyyəti bəd əməllər üçün yox, xoş məramlar üçün fürsət bilin.

Tofiq Yaqublunu, Fuad Əhmədovu, Babək Həsənovu, başqa siyasi məhbusları azadlığa buraxın. Digər məhbuslar üçün amnistiya verin.

Qara gündə olan insanların yaşayışını təmin etmək üçün dövlət büdcəsinin, milyardların toplandığı fondların ağzını açın.

Sərt qərarlar olmasa itkilərimiz çox olacaq.

Yasamalda tamaşa düzəldən icra hakimiyyəti, metroda süni basabas yaranmasına səbəb olan qərarları verənlər, ən vacib ərzaq məhsulları və tibbi ləvazimatı gizlədib süni yolla qiymətlərin artırılmasına çalışan möhtəkirlər məsuliyyətə cəlb olunmalıdır.

Aztəminatlı ailələrə sosial yardım edilməsi üçün xüsusi dövlət proqramı hazırlanıb həyata keçirilməli və digər zəruri işlər görülməlidir.

…Şanslıyıq ki, koronavirus dalğasının önündə deyilik.

Başqa dövlətlərin, xalqların təcrübəsindən istifadə etmək imkanımız var. Öyrənək, yararlanaq!

Mənbə: “Facebook”