“Get gözətçi təyin et” və “İzabel üçün. Mandala”
“Qanun” Nəşrlər Evinin çap etdiyi yeni kitablardan ikisi haqda qısa məlumatları oxucuların diqqətinə çatdırırıq.
Harper Li, “Get gözətçi təyin et”
Maykomb, Alabama. 26 yaşlı Jan Luiza Finç – “Skaut” yaşlanmış atasına, Attikusa baş çəkmək üçün Nyu-Yorkdan vətənə qayıdır. Həmin vaxtlarda ölkədəki insan haqları uğrunda mübarizə, siyasi çaxnaşmalar Cənuba da gəlib çıxmışdı. Jan Luiza doğma şəhəri, qohumları, ona əziz olan insanlar haqda əsl həqiqəti öyrənəndən sonra onun vətənə gəlişindən duyduğu sevinc hissinə kədər qatılır. Uşaqlıq illəriylə bağlı xatirələr yadına düşür, mənəvi dəyərlərə olan inamını şübhə bürüyür. “Get gözətçi təyin et” romanının əsas obrazları “Bülbülü öldürmək” romanındakı obrazlardır. Bu kitab gənc qızın keçmiş illüziyalarıyla zəngindir. O, xəyalən keçmişə dönür – keçmişə səyahətə yalnız hər şəxsin öz yaddaşı bələdçilik edir.
Bu kitab 1950-ci illərin ortalarında yazılıb. Harper Linin ölkədəki hadisələrə baxışını ifadə edir. Müdriklik, insanlıq, ehtiras, yumorla dolu bu kitab başqa bir eranın xatirələrini oyadır, eləcə də bizim zamanlar üçün münasibdir. Bu roman nəinki “Bülbülü öldürmək” əsərinin möhtəşəmliyini təsdiq edir, həm də Amerika klassikasına yeni məna gətirib.
Kitabın satış qiyməti 12.90 manatdır.
Antonio Tabukki, “İzabel üçün. Mandala”
Antonio Tabukkinin “İzabel üçün. Mandala” romanı dünya şöhrətli italyan yazıçısının sonuncu əsəridir və ölümündən sonra çap olunub. Romanda İzabel adlı itmiş portuqaliyalı qadınla onun axtarışında olan polyak əsilli, portuqaliyalı yazıçı Tadeuşun mistik ayrılıq hekayətindən bəhs edilir. Dünyasını dəyişmiş Tadeuş Böyük Ayı bürcünün ən parlaq ulduzu olan Siriusun ətraflarından qayıdaraq bir vaxtlar sevdiyi İzabelin axtarışına çıxır. Bu sirli səyahətdən bəhs edən metafizik roman marağınıza səbəb olacaq.
Əsəri italyan dilindən Cəmşid Cəmşidov tərcümə edib.
Kitabın satış qiyməti 6.99 manatdır.
