Qənimət Zahidin ilk romanı
Mühacirətdə yaşayan azərbaycanlı jurnalist Qənimət Zahidin “Son dərviş” adlı romanı çapdan çıxıb.
“Son dərviş” Qənimət Zahidin ilk romanıdır.
Novator.az-ın məlumatına görə, müəllif “Son dərviş”i tarixi-fəlsəfi əsər kimi xarakterizə edib. O, əsərin annotasiyasında bildirib: “Bu kitabda oxuduğunuz hekayət olmuşdurmu? Kimsə onun olub- olmadığını söyləyə bilməz. Bəlkə çoxlarının xəbəri yoxdur bu olaylardan, amma xəbəri olanlar da çoxdur. Gözünüzü zilləyib tarixə diqqətlə baxın, sonra da çevrənizdəki insanlara və onların taleyinə baxın: görəcəksiz ki, heç nə uydurma deyil. Görəcəksiz ki, bu kitabda hansısa səhifədə, hansısa fəsildə elə sizin də taleyinizdən nəsə yazılıb və onların heç biri uydurma deyil. Əlbəttə, bu bir tarix deyil, tarixin öyküsüdür. Bizim birgə tariximizin öyküsüdür”.
Sosial şəbəkədə yaydığı açıqlamasında Qənimət Zahid əsəri bir il qabaq bitirdiyini, redaktə və korrekturanın uzun zaman aldığını və buna görə indi çap edildiyini diqqətə çatdırıb.
Qənimət Zahid 1963-cü il fevralın 10-da Şamaxının Qurdtəpə kəndində doğulub. 1990-cı ildə Bakı Dövlət Universitetini bitirib.
1991-1994-cü illərdə “Azadlıq” qəzetinin redaktoru olub, sonralar bir müddət “Azad Söz” Jurnalistlər Birliyinə sədrlik edib. 2003-cü ildən “Azadlıq” qəzetinin baş redaktorudur.
2007-2010-cu illərdə həbsdə olub.
2011-ci ildən Fransada yaşayır. Xaricdən yayılan “Turan TV”nin rəhbəri, “Azərbaycan saatı” televiziya proqramının müəllifi və aparıcısıdır.
1989-cu ildə yaradılan “Azadlıq” qəzeti 2016-cı il sentyabrın 5-dən çapını dayandırıb.
