“Stiv Cobs” kitabı Azərbaycan dilində çıxıb
“Qanun” Nəşrlər Evi Uolter Ayzeksonun (Walter Isaacson) “Stiv Cobs” kitabını Azərbaycan dilində çap edib.
Kitabın əsasını amerikalı ixtiraçı, biznesmen, “Apple” şirkətinin yaradıcılarından biri və baş icraçı direktoru olmuş, 2011-ci ildə 56 yaşında vəfat etmiş Stiv Cobsla, həmçinin onun qohumları, dostları, düşmənləri, rəqibləri və həmkarları ilə söhbətlər təşkil edir.
Cobs müəllifə ümumiyyətlə nəzarət etməyib. O, bütün suallara tam səmimi cavab verib və digərlərindən də bu səmimiliyi gözləyib.
Bu – eniş və yoxuşla dolu bir həyat, güclü insan və XXI əsrdə uğur qazanmaq üçün kreativliyi və texnologiyaları birləşdirməyin vacibliyini başa düşənlər sırasında birincilərdən olan istedadlı iş adamı haqqında hekayədir.
Kitab ABŞ-da 2011-ci ilin oktyabrında – Stiv Cobsun vəfat etdiyi ay işıq üzü görüb və dərhal da Amazon.com-un reytinqində birinci olub.
Kitabı azərbaycancaya Ziya Fazil tərcümə edib.
Kitabın satış qiyməti 24.40 manatdır.
