Qara siyahıda 850-dən çox adam var
Polşa vətəndaşı, “Glob-Press” agentliyinin baş redaktoru Vlodimej Kjijanovski Azərbaycanın işğal olunmuş ərazilərinə qanunsuz səfər etmiş xarici ölkə vətəndaşlarının qara siyahısından çıxarılıb. Xarici İşlər Nazirliyinin 10 oktyabr məlumatına görə, Vlodimej Kjijanovski bu quruma məktubla müraciət edərək Azərbaycanın ərazi bütövlüyünə və suverenliyinə hörmət etdiyini, işğal edilmiş ərazilərə səfərinin törədə biləcəyi nəticələr barədə məlumatsız olduğunu, gələcəkdə qanunsuz səfərdən çəkinəcəyini vurğulayıb.
Azərbaycanın Dağlıq Qarabağ bölgəsi və onun ətrafındakı 7 rayon Ermənistanın işğalı altındadır. Xarici İşlər Nazirliyi işğal altındakı ərazilərə qanunsuz səfər etmiş əcnəbilərin adlarını qara siyahıya alaraq onların Azərbaycana səfərini yasaqlayır.
Arzuolunmaz şəxslər siyahısı sonuncu dəfə 2019-cu il sentyabrın 2-də yenilənib. Novator.az bildirir ki, həmin siyahıda 852 nəfərin, o cümlədən Vlodimej Kjijanovskinin adı olub. Vlodimej Kjijanovski işğal bölgəsinə 2018-ci ilin aprel ayında səfər etdiyi üçün qara siyahıya salınmışdı.
