Demokratik Qüvvələrin Milli Şurası oktyabrın 19-u paytaxtda mitinq keçirmək niyyətindədir.
Novator.az-ın məlumatına görə, Bakı Şəhər İcra Hakimiyyətinə rəsmi müraciətdə mitinqə üç yerdən birini ayırmaq təklif olunub: “28 May” metro stansiyasının qarşısındakı meydan, Tofiq Bəhramov stadionunun qarşısındakı meydan və “Nəriman Nərimanov” metro stansiyasının yanındakı park.
İbrahim İbrahimli, Nurəddin Məmmədli, Vahid Məhərrəmli, İlham Hüseyn, Rövşən Əhmədli, Tofiq Yaqublu və başqalarının imzaladığı müraciətdə Bakı Şəhər İcra Hakimiyyətinin təklif edəcəyi alternativ variantların müzakirə oluna biləcəyi də vurğulanıb.
2013-cü ildən Bakıda mitinqlərə Yasamal rayonundakı İdman-Sağlamlıq Kompleksinin stadionu (metronun “İnşaatçılar” stansiyasının yaxınlığı) ayrılıb. Burada sonuncu mitinqi 2019-cu il yanvarın 19-da Milli Şura keçirib. Bundan sonra Bakı Şəhər İcra Hakimiyyəti paytaxtda aksiya keçirməyə icazə verməyib, sentyabr ayında isə Yasamaldakı İdman-Sağlamlıq Kompleksinin təmirə başlandığı bəyan olunub.
Milli Şura sentyabrın 28-nə təyin etdiyi mitinq üçün Bakı Şəhər İcra Hakimiyyətindən “28 May” metro stansiyasının qarşısındakı meydanı, Tofiq Bəhramov stadionunun qarşısındakı meydanı və “Nəriman Nərimanov” metro stansiyasının yanındakı parkı istəyib. Paytaxt rəhbərliyi Milli Şuraya mitinqi Qaradağ rayonunun Lökbatan qəsəbəsində, “Neftçi” İdman Klubu Birliyinin Qaradağ Təlim-İdman Bazasının stadionunda keçirməyi məsləhət görüb. Təklifdən imtina olunub.
Milli Şura gediş-gəlişin rahat olduğu meydan istəyir və bu tələblə oktyabrın 8-i Bakının mərkəzində piket və yürüş keçirib.
2013-cü ildə yaradılmış Milli Şuraya tarix elmləri doktoru Cəmil Həsənli sədrlik edir. Milli Şuranın fəaliyyətinə rəhbərlik edən Koordinasiya Mərkəzində AXCP sədri Əli Kərimli də yer alır.
Milli Şura mitinq meydanı istəyir
Milli Şuraya Lökbatanı təklif etdilər
Milli Şura Bakının mərkəzinə aksiya təyin edib
