Rövşən Ağayev

Paytaxtda, son zamanlar həmçinin Xırdalan şəhərində adamları yoran, saatlarla küçələrdə qalmağa məcbur edən tıxacların səbəblərini rəsmi şəxslər, onların arqumentlərinə dəstək olan media-ekspert qrupu avtomobillərin sayının hədsiz çoxluğu ilə əsaslandırır.

Rəsmi statistikaya görə, indi Bakıda hətta qeydiyyatsız yaşayan əhali nəzərə alınsa, əhalinin hər 1000 nəfərinə 250 avtomobil düşür. “Dövlət Şəhərsalma norma və qaydaları”nda rəsmiləşən standartlara əsasən, hər 1000 nəfərə 300-dək avtomobilin olması normadır. İctimai nəqliyyat şəbəkəsinin effektiv qurulduğu, yol infrastrukturunun düzgün tikildiyi şəraitdə hər 1000 nəfərə 300 ədəd avtomobil yolverilən saydır.

“Dövlət şəhərsalma norma və qaydaları” nın 8.3-cü maddəsinə görə, iri və böyük şəhərlərdə hər 1000 nəfərə 3-4 taksi, 250-dək minik avtomobili, 40-dək iritutumlu avtomobil sayı normadır. Orta ölçülü və kiçik şəhərlərdə həmin normalar daha aşağıdır.

Standartlarda taksidən savayı digər ictimai nəqliyyat növlərinin sayının necə müəyyən edilməsi də əksini tapıb. 8.30-cu maddəyə görə, sürətli olmayan, adi sürət rejimində çalışan nəqliyyat vasitələrində sərnişin salonu döşəməsinin hər kvadratmetri üçün 4 nəfər, sürətli nəqliyyat vasitələrində isə 3 nəfər olmaqla ictimai nəqliyyata tələbat hesablanmalıdır.

İri və böyük şəhərlərdə ərazinin hər kvadrat kilometrinə (hər 100 hektara) 4,5 kilometr uzunluqda ictimai nəqliyyatın hərəkət etdiyi yol (xətt) şəbəkəsi düşməlidir. Məsələn, Xırdalanda 1500 hektar məskunlaşma ərazisi varsa, ictimai nəqliyyat yollarının uzunluğu azı 70 kilometr təşkil etməlidir.

Bu standarta əməl edilərsə, şəhərin istənilən nöqtəsində bütün sakinlərin ictimai sərnişin nəqliyyatının ən uzaq dayanacağına qədər piyada gedişi məsafəsinin də 400 metrədək olması təmin edilər (8.33-cü maddə).

8.35-ci maddəyə görə, sərnişinlərin nəqliyyat dəyişməsi üçün vaxt nəqliyyatı gözləmə müddəti nəzərə alınmaqla 3 dəqiqədən artıq olmamalıdır.

İctimai nəqliyyat şəbəkəsinin və yol infrastrukturunun təşkili normalarına əməl edilsə, Bakı və ətrafında indiki ölümcül tıxaclar olmaz…