“Demokratiya: gediləsi uzun bir yol”
“Qanun” Nəşrlər Evi Hikmət Hacızadənin “Demokratiya: gediləsi uzun bir yol” antologiyasını çap edib.
Antologiyanın böyük hissəsi ilk dəfə olaraq Azərbaycan türkcəsinə çevrilmiş 60-dan çox məqalədən ibarətdir. Bu məqalələr oxucuları çoxluğun mütləq hakimiyyətinə söykənən antik demokratiyadan başlayaraq müasir demokratiyaya – çoxluğun hakimiyyətini insan hüquqları ilə məhdudlaşdıran liberal demokratiyaya qədərki demokratik sistemin keyfiyyət inkişafı ilə tanış edir.
Bundan əlavə, toplu demokratiyanın məkanca inkişafını – antik şəhər-dövlətlərdən üzü bəri Avropanın millət-dövlətlərinə, oradan da cizgiləri artıq bu gün beynəlxalq qurumlar timsalında aydın sezilən gələcək ümumbəşər hökumətinə doğru uzanan yolunu izləməyə imkan verir.
Kitaba başlıca olaraq Amerikadakı, Qərbi və Şərqi Avropadakı demokratiyanın problemləri haqqında materiallar daxil edilib; burada Azərbaycandakı demokratiyanın problemləri barədə beş məqalə də var ki, onlar ayrıca fəslə ayrılmayaraq, digər materialların arasında xronoloji qaydada düzülməklə bütün dünyada gedən demokratik prosesin vahid təbiətini əyani nümayiş etdirir.
Demokratiyanın tərkib hissəsi olan insan hüquqları mövzusu ilə daha əsaslı tanış olmaq istəyənlər üçün antologiyada “İnsan hüquqları bəşəriyyətin başlıca ideyasıdır” essesi təqdim olunub. Bu esse lazım gəldikdə ictimai fənn müəllimləri və ali məktəb tələbələri üçün dərs vəsaiti rolunu oynaya bilər.
Kitabın satış qiyməti 12.99 AZN-dir.
“Qanun”un mağazası həftə boyu işləyir (Ünvan: Bakı, Tbilisi prospekti, 76. Azərbaycan Universitetinin yanı). Mağaza həftənin altı günü (bazar ertəsi-şənbə) səhər saat 9-dan 18-dək, bazar günü səhər saat 10-dan 17-dək açıq olur.
Kitabları nəşriyyatın (012) 431 16 52 nömrəli telefonu və ya Qanun.az saytı vasitəsilə də sifariş etmək olar. Çatdırılma paytaxtın “20 Yanvar” metro stansiyasının çıxışına pulsuzdur.
