İyulun 26-da sərəncam imzalayan prezident İlham Əliyev “Yüksəliş” müsabiqəsi təsis edib. Müsabiqənin məqsədinin intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək olduğu vurğulanır.

Novator.az-ın məlumatına görə, müsabiqənin keçirilməsi ilə əlaqədar bu tərkibdə təşkilat komitəsi yaradılıb:

Sədr

Fərəh Əliyeva – Prezident Administrasiyasının humanitar siyasət məsələləri şöbəsinin müdiri

Üzvlər

Mikayıl Cabbarov – vergilər naziri

Azad Rəhimov – gənclər və idman naziri

Ceyhun Bayramov – təhsil naziri

Sahil Babayev – əmək və əhalinin sosial müdafiəsi naziri

Anar Ələkbərov – birinci vitse-prezidentin köməkçisi

Ülvi Quliyev – Milli Məclisin deputatı

Məleykə Abbaszadə – Dövlət İmtahan Mərkəzinin Direktorlar Şurasının sədri

Balakişi Qasımov – İctimai Televiziya və Radio Yayımları Şirkətinin baş direktoru.

Təşkilat komitəsinə müsabiqə üzrə əlaqələndirmə işlərinin həyata keçirilməsi ilə əlaqədar işçi qrup yaratmaq, gənclər və idman nazirinin müavinini işçi qrupun rəhbəri təyin etmək, müsabiqənin keçirilməsi qaydalarını təsdiqləmək həvalə olunub.

İşçi qrup müsabiqənin keçirilməsini təmin edəcək qurumu müəyyən etməlidir.

Müsabiqə üzrə cari işlərin həyata keçirilməsi üçün səlahiyyətli orqan kimi Gənclər və İdman Nazirliyi seçilib. Bu məqsədlə 2019-cu ilin dövlət büdcəsindən, prezidentin ehtiyat fondundan nazirliyə 1 milyon manat ayrılır.