Martın 17-də Ədliyyə Nazirliyinin Penitensiar Xidməti prezident İlham Əliyevin ötən gün imzaladığı əfv sərəncamını icra edib.

16 mart sərəncamı ilə 399 nəfər həbsdən buraxılıb, ömürlük azadlıqdan məhrumetmə cəzasına məhkum edilmiş 3 nəfərin cəzası müddətli həbslə əvəzlənib, azadlıqdan məhrumetmə cəzasına məhkum olunan və cəzasının çəkilməsi təxirə salınmış 1 nəfər, azadlıqdan məhrumetmə cəzasına şərti məhkum edilmiş 11 nəfər cəzadan azad olunub. Azadlığın məhdudlaşdırılması cəzasına məhkum edilmiş 1 nəfər cəzasının çəkilməmiş hissəsindən, 3 nəfər islah işləri, 1 nəfər ictimai işlər, 12 nəfər cərimə cəzasından qurtulub.

Əfv olunanlar arasında adı siyasi məhbus siyahılarında keçən şəxslər də var. Sabiq səhiyyə naziri Əli İnsanov, AXCP sədrinin müavinləri Fuad Qəhrəmanlı, Gözəl Bayramlı, Müsavat Partiyasının üzvü Əlikram Xurşidov, gənc fəallar İlkin Rüstəmzadə, Qiyas İbrahimov, Bayram Məmmədov, keçmiş prokurorluq işçisi Rüfət Səfərov, jurnalistlər Nicat Əliyev, Fikrət Fərəməzoğlu, bloqçu Rəşad Ramazanov, şair Tofiq Həsənli, AXCP sədri Əli Kərimlinin qayını Elnur Seyidov, jurnalist Natiq Ədilovun qardaşı Murad Ədilov və başqaları həbsdən çıxıblar.

Siyasi Məhbusların Vahid Siyahısı üzrə İşçi Qrupun (Xədicə İsmayıl, İntiqam Əliyev, Anar Məmmədli, Xalid Ağalıyev, Rövşən Hacıbəyli və başqaları) siyasi məhbus saydığı şəxslərdən 50 nəfərə yaxınının əfvə düşdüyü bildirilir.