Dövlət Statistika Komitəsi makroiqtisadi göstəriciləri açıqlayıb. Novator.az-ın məlumatına görə, rəsmi hesabatda qeyd olunur ki, 2019-cu ilin ilk iki ayında kənd təsərrüfatının ümumi məhsulu 2018-ci ilin yanvar-fevral ayları ilə müqayisədə 3,6 faiz, o cümlədən heyvandarlıq məhsullarının istehsalı 2,5 faiz, bitkiçilik məhsullarının istehsalı 43,7 faiz artıb.
Rəsmi açıqlamaya əsasən, həm yük daşınması, həm də sərnişin daşınmasında 1,3 faiz artım qeydə alınıb.
İnformasiya və rabitə xidmətlərinin həcminin dəyər ifadəsində 9,3 faiz artdığı, bu sahədə əldə edilmiş gəlirin 81,6 faizinin qeyri-dövlət sektorunun payına düşdüyü bildirilir.
Əhalinin gəlirlərinin 2018-ci ilin yanvar-fevral ayları ilə müqayisədə nominal ifadədə 5,1 faiz artaraq 7 milyard 619,7 milyon manat təşkil etdiyi vurğulanır.
İki ayda dövlət büdcəsinə 3 milyard 532,9 milyon manat vəsait daxil olub, büdcədən 2 milyard 954,8 milyon manat vəsait xərclənib.
Fevral ayının 1-nə ölkənin bank və digər kredit təşkilatlarının kredit portfeli milli valyuta ekvivalentində 12 milyard 884,7 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 12,2 faizinə bərabər olub.
Əhalinin banklardakı əmanətlərinin milli valyuta ekvivalentində məbləği fevralın 1-nə 8 milyard 75,9 milyon manat göstərilib.
