Ukraynalıların 13 faizi hər gün 2 saatdan çox, 25 faizi 1-2 saat, 23 faizi isə 1 saata qədər kitab oxuyur. Novator.az xəbər verir ki, bunu Ukrayna İqtisadi və Siyasi Tədqiqatlar Mərkəzinin keçirdiyi sosioloji sorğu göstərib.

Sorğuda Ukraynanın 122 yaşayış məntəqəsindən 2013 nəfər iştirak edib. Nəticələrə görə, ukraynalıların ən populyar əyləncəsi – televiziyaya baxmaq (58 faiz), medianı, əsasən də internet mediasını izləmək (31 faiz), sosial şəbəkələrdə fəallıq göstərmək (30 faiz), radio dinləməkdir (22 faiz).

Ən populyar əyləncələr sırasında kitab oxumaq beşinci yerdə gəlir.

Sorğunun nəticələrinə görə, təhsil, elm, səhiyyə, mədəniyyət işçilərinin 55 faizi hər gün 1 saatdan çox; banklarda, sənaye müəssisələrində, maliyyə sektorunda çalışanların hər üç nəfərindən biri gündə 1 saat kitab oxuyur. Tələbə və şagirdlərin 55 faizi gündə 1 saatdan artıq mütaliə edir.

Kitaba ən çox maraq göstərənlər ali təhsilli şəxslərdir. Gündə 1 saatdan çox kitab oxuyanların 58 faizi onlardan ibarətdir.

Tədqiqat Ukrayna əhalisinin 31 faizinin il ərzində bir kitab da oxumadığını üzə çıxarıb.

Səidə Hüseynova