Ağlamaq niyə xeyirlidir?
Yaponiyanın məktəb və şirkətlərində “ağlamaq dərsi” populyarlaşır. Novator.az-ın məlumatına görə, bu dərslər məktəblilərin, işçilərin stressdən çıxması və onların psixi sağlamlığının müdafiəsi məqsədi güdür. Təşəbbüsçülər göz yaşını daxili gərginliyə qarşı özünümüdafiə üsulu sayır.
Özünü “ağlamaq müəllimi” adlandıran keçmiş orta məktəb müəllimi Hidefumi Yoşida keçirdiyi xüsusi məşğələlər zamanı göz yaşının faydasından danışır və onun köməyi ilə gərginliyi azaltmağı öyrədir. Mütəxəssis gərginlikdən çıxmaq üçün ağlamağın gülüş və ya yuxudan daha effektiv olduğunu deyir.
Hidefumi Yoşidanın sözlərinə görə, göz yaşını sentimental filmlər, qəmli mahnılar və ruhlandırıcı kitablar vasitəsilə stimullaşdırmaq mümkündür.
Yaponiyada 2015-ci ildən qüvvədə olan qanuna əsasən, 50-dən çox işçisi olan şirkətlər öz işçilərini stress testindən keçirməlidir.
Səidə Hüseynova
