Yasamala icra başçısı təyin olundu
Fevralın 2-də Bakının Yasamal rayonuna yeni icra başçısı təyin olunub. Prezident İlham Əliyevin sərəncamı ilə bu post Əziz Əzizova həvalə edilib.
Əziz Əzizov Cəlilabad Rayon İcra Hakimiyyətinin başçısı idi.
Yasamal Rayon İcra Hakimiyyətinin başçısı vəzifəsi ötən il iyulun 1-də İbrahim Mehdiyev bu postdan çıxarılandan boş idi.
Əziz İmran oğlu Əzizov 1963-cü ildə Cəbrayıl rayonunda anadan olub. İndiki Dövlət Neft və Sənayə Universitetini mühəndis ixtisası üzrə bitirib.
1985-ci ildən paytaxtda tramvay parkında usta, yol təhlükəsizliyi müfəttişi, yol təhlükəsizliyi idarəsinin rəisi işləyib, istismar idarəsi rəisinin vəzifəsini icra edib.
1992-1993-cü illərdə Bakı Şəhər Nəqliyyat Departamentində texniki şöbənin rəisi olub. 1993-1996-cı illərdə həmin departamentdə hərəkətin təhlükəsizliyi üzrə rəis vəzifəsində çalışıb.
1996-2006-cı illərdə sahibkarlıq fəaliyyəti ilə məşğul olub.
2006-cı ilin avqust ayından Cəlilabad Rayon İcra Hakimiyyətinin başçısı vəzifəsini tutub.
Yeni Azərbaycan Partiyasının üzvüdür. Ailələdir, 3 övladı var.
