Mövlud Mövludun xatirəsinə müsabiqə start götürdü
“Teleqraf Holdinq”in tərkibində fəaliyyət göstərən Kult.az mədəniyyət portalı mərhum yazıçı Mövlud Mövludun xatirəsinə “Mövlud Mövlud Mükafatı” adlı hekayə müsabiqəsinə start verir.
Müsabiqədə yaşı 40-dək olan bütün yazarlar iştirak edə bilərlər.
Hər müəllif müsabiqəyə yalnız 1 hekayə göndərə bilər.
Hekayələrin həcmi 15 min işarədən çox olmamalıdır.
Müsabiqəyə yalnız çap olunmamış hekayələr buraxılacaq.
Hekayələr korrektə olunaraq göndərilməlidir. Həddən artıq korrektə səhvi olan mətnlər müsabiqəyə qəbul olunmayacaq.
Müsabiqəyə əsər qəbulu aprelin 12-dən başlanır. Əsərlərin qəbulu iyunun 30-da bitəcək.
Müəlliflər öz mətnlərini [email protected] elektron poçtuna göndərməlidirlər.
Hər müəllif mətnlə birlikdə şəxsiyyət vəsiqəsinin surətini də göndərməlidir (şəxsiyyət vəsiqəsinin surəti Word faylının içində olmamaq şərti ilə).
Müsabiqədə mövzu məhdudiyyəti yoxdur.
“Mövlud Mövlud Hekayə Mükafatı” laureatı adını qazanan yazarlar pul və diplomla mükafatlandırılacaqlar. 1-ci yer üçün 1000 manat, 2-ci yer üçün 700 manat, 3-cü yer üçün 500 manat məbləğində mükafat fondu ayrılıb.
Müsabiqədə 10-luğa düşən əsərlər toplanaraq kitab halında çap ediləcək və qaliblərin elan edildiyi tədbirdə təqdim olunacaq.
Mətnlər münsiflərə müəlliflərin adı gizli saxlanılaraq təqdim olunacaq və münsiflərin, qaliblərin adları yalnız mükafatlandırma mərasimində açıqlanacaq.
Mükafatlandırma mərasiminin sentyabr ayının sonlarında keçirilməsi planlaşdırılır.
Qaliblərin müəyyən olunması qaydasına gəlincə, münsiflər ayrı-ayrılıqda bütün əsərləri oxuyub, layiq bildikləri 10 hekayəni 10 ballıq sistemlə qiymətləndirəcəklər. Təşkilat Komitəsi ən çox bal almış hekayələri seçib 10-luğu, bundan sonra isə qalib üçlüyü müəyyən edəcək.
Bundan sonra 10-luq Kult.az mədəniyyət portalında onlayn səsverməyə çıxarılacaq.
Onlayn səsvermədə qalib olan 1 hekayə oxucuların seçimi kimi qiymətləndiriləcək və bunun münsiflərin seçiminə heç bir aidiyyəti olmayacaq.
Onlayn səsvermənin qalibi də diplom, eləcə də planşet və ya mobil telefonla mükafatlandırılacaq.
Ola bilər ki, onlayn səsvermənin qalibi münsiflərin seçdiyi 3 hekayədən biri olsun. Belə olan halda həmin hekayənin müəllifi həm münsif seçiminin, həm də onlayn səsvermənin qalibi kimi hər iki mükafatı alacaq.
Gənc yazar Mövlud Mövlud bu il martın 16-da faciəli şəkildə dünyasını dəyişib.
