Ekologiya və Təbii Sərvətlər Nazirliyinin 2017-ci ilin yanvar, fevral, mart aylarında keçirdiyi reydlər zamanı qanunsuz ov edən 65 yerli vətəndaş saxlanıb. Ətraf Mühitin Mühafizəsi Departamentinin sektor müdiri Raqub Mirzəyev APA-ya bildirib ki, həmin şəxslərdən 61 ov tüfəngi, 147 patron, 15 qanunsuz ovlanmış heyvan götürülüb.

Raqub Mirzəyevin sözlərinə görə, qanunu pozan 56 nəfər inzibati qaydada 56 200 manat məbləğində cərimə edilib, 1936 manat məbləğində ziyan tətbiq olunub.

Sektor müdiri qeyd edib ki, sənəd təqdim etməyən şəxslər barəsində tədbir görülməsi üçün rayon polis şöbələrinə müraciət olunub: “Şəxsiyyətləri müəyyənləşdirildikdən sonra həmin şəxslər də qanunvericiliyə uyğun qaydada məsuliyyətə cəlb olunacaqlar”.