Gürcüstanın işğal olunmuş Cənubi Osetiya bölgəsində aprelin 9-da keçirilmiş qanunsuz referendumun ilkin nəticələri açıqlanıb. Novator.az-ın məlumatına görə, “referendum”da seçicilərin 78%-nin qanunsuz Cənubi Osetiya Respublikasının eyni zamanda Alaniya Dövləti adlanmasına tərəfdar çıxdığı bəyan olunub.

Referendumla eyni vaxtda “prezident seçkisi” keçirilib. Bu postu “parlament sədri” Anatoli Bibilov tutub.

Cənubi Osetiya Gürcüstanın tərkibində muxtar vilayət olub. Bu vilayət, eləcə də Abxaziya bölgəsi 1990-cı illərdən özünü müstəqil dövlət elan etmiş rejimlərin əlindədir. 2008-ci ildə Rusiya Abxaziya və Cənubi Osetiyanı hərbi təcavüzlə işğal edərək onları “müstəqil dövlət” kimi tanıyıb. Hər iki bölgədə Rusiyanın hərbi bazaları var.

Zaman-zaman Cənubi Osetiyanın Rusiyanın Şimali Osetiya Respublikasına (Alaniya) birləşdirilməsi təklifləri səslənir.

Novator.az xatırladır ki, bu il fevralın 20-də işğal altındakı Azərbaycan ərazilərində keçirilmiş qanunsuz “konstitusiya referendumu”nda Dağlıq Qarabağ bölgəsinin adı dəyişdirilib, separatçı rejim “Arsax Respublikası” adını əsas ad seçib.