Qar zəhərli maddələri udur
Kanadanın Makgill Universiteti alimlərinin araşdırması nəticəsində məlum olub ki, qar toksiki və kanserogen çirkləndirici maddələri özünə çəkə bilir. Araşdırmaya görə, qar – üzvi çirkləndiriciləri, zəhərli olan və xərçəng xəstəliyi yarada bilən, çoxnüvəli aromatik karbohidrogenləri absorbsiya etmək (absorbsiya – mayenin qaz qarışığından hər hansı bir maddəni udması prosesidir) qabiliyyətinə malikdir.
Laboratoriya şəraitində xüsusi nəzarət temperaturuna malik şüşə sferaya təzə qar nümunəsi daxil edən tədqiqatçılar müasir avtomobillərdən birinin benzin mühərrikindən işlənmiş qazların xaric edilməsinə nail olublar.
Tədqiqatçılar daha sonra aşağı mühit temperaturunda maşın emissiyaları ilə qar arasında bağlılığın təhlilini aparıblar. Araşdırma zamanı məlum olub ki, 30 dəqiqə ərzində qar nümunəsi maşın mühərrikindən çıxan üzvi çirkləndiriciləri, eləcə də aerozol hissəciklərinin əksəriyyətini özünə çəkə bilib.
Nəticələr sübut edib ki, havada olan çirkli maddələr qarla qarışıb fərqli tərkib yaradır, qar əridiyi zaman isə kanserogen maddələr torpağa, havaya və suya qarışmaqla zərərverici təsirlər yaradır.
Nəticələr “Environmental Pollution” jurnalında nəşr olunub.
AZƏRTAC
