Qarabağ – xarici işimiz
Vahid QAZİ
Özümə yüz kərə demişəm gündəm söhbətlərinə qoşulmayım, olmur. Səbəbi sadədir, çox vaxt gündəmin “materialı”nı, yəni nədən hazırlandığını, nə məqsəd güddüyünü anışdıra bilmirəm. Elə ustalıqla gündəm düzəldirlər ki, heç mətbuat professorları da baş açmaz hansı “kitayski”dir, hansı orijinal.
Saytlarda oxudum ki, Rusiyanın xarici işlər naziri Sergey Lavrov belə bir söz deyib: “Qarabağ münaqişəsi Azərbaycanın daxili işi deyil”.
Onun bu açıqlaması neçə gündür gündəmdədir. Mən də düşdüm gündəm “tələ”sinə. Qoşuldum Lavrov haray-qışqırığı salanlara, atdım özümü gündəmin gur yerinə, Feysbuk-da belə yazdım: “Lavr” bizim dildə dəfnə ağacı deməkdir. Lazım gəlsə, Lavrovlara dəfnə budaqlarından çələng də hörərik. O biri ”lazım”a baxmayın, bu ”lazım”a həmişə hazırıq…”.
Sonra da yazdığıma məəttəl qaldım. Yahu, bu Lavrov təzə nə deyib ki, özümüzə belə əl qatırıq? Qarabağ münaqişəsinin Azərbaycanın daxili işi olmadığını bizim bələkdəkilərdən savayı hansı kəsimiz bilmir?!
Qarabağ 25 ildir bizim daxili yox, xarici işimizdir!
“Müdrik”, “uzaqgörən”, “balanslı” siyasətimizlə onu dünya məsələsinə çevirmədikmi?! Daxili işimiz olsaydı, çoxdan həll edərdik. Daxili işlərimizin öhdəsindən özümüz yaxşı gələrik.
Məsələn, heykələ söz yazana elə cəza verərik qıraqdan baxan deyər bəs adam öldürüb. Feysbuk-da, Yutub-da “sarsaq-sarsaq şeylər yazan, yayanlar”ı tutub atarıq qoduqluğa. Kim nə deyəcək bizə? Söz azadlığı daxili işimizdir.
Ölkəiçi daxili işlərimiz öz yerində, çöldə də saysız-hesabsız “daxili işlərimiz” var. Amerikanın, Avropanın dağılmasına ürəyimiz ağrıyar, Gürcüstanın kilsələrində qazın olmamasına öz dərdimiz kimi yanarıq və sairə.
Göydə ulduzlar yola getmir – kosmosda peykimiz var, barışdırar, yoluna qoyarıq. Ciddi deyirəm!
Sözümün canı nədir? Dünyanın lap o başında nəyi desən daxili işimiz sayarıq – Qarabağdan savayı!
Qarabağ bizim xarici işimizdir!
“Лавровый венок – хомут для головы” məsəlini bu axşam dostlarla birləşib birtəhər dilimizə çevirdik. Belə alındı: “Dəfnə çələngi başa boyunduruqdu”.
“Lavr”dan – dəfnədən tək zəfər çələngi yox, lazım gəlsə, boyunduruq da qayırırlar, anladım ki, Lavrov həm də bunu deyir.
…Saxtasıyla əslini ayırd etməyi öyrənim, qoşulacam gündəm söhbətlərinə!
Müəllifin başqa yazıları: • “İslamda tolerantlıq varmı?” sualı İsveçdə • Ədəbiyyatı dünya hadisəsinə çevirən xalqın kitabı • Şərm-həyanın qiyməti • Yolda o(qa)lan yolçuluqlar • Zəmanələr və talelər toplusu • “İztirab — vətəndə qərib olmaqdır” • Darıxan səbir (Hikmət Sabiroğlunun 50 yaşına neçə günsə qalmış) • Salam, Gülsarı! • Dilimizi uçurumdan qoruyan (Tehran Vəliyevin xatirəsinə) • İntim dildə yaza bilmək • Vyanada Şuşa günləri (Fotolu, xatirəli reportaj) • Türkiyə islam inqilabı? • Varşava – azadlıq və sevgi şəhəri • Çəmənzəminlinin ”Studentlər”i haqda • Ağalar Məmmədovun məktubları • Günəş kitablar (İsveç kitabxanasından payız qeydləri) • Etiraz hüququ • Qış günəşi parlaqdır, amma isitmir
