Zamin Salayev eksperimenti
Qaradağ Rayon Məhkəməsi AXCP funksioneri Zamin Salayevin cinayət işi üzrə növbəti prosesi mayın 17-nə təyin edib.
Bakı İstintaq Təcridxanasında saxlanan Zamin Salayev AXCP Salyan şöbəsinin sədridir. O, fevralın 7-si Bakıda tutulub, silah tətbiq etməklə xuliqanlıqda təqsirli bilinir. Rəsmi iddiaya görə, cəbhəçi həmin gün paytaxt sakini Natiq Süleymanova bıçaqla xəsarət yetirib. İstintaqı Qaradağ Rayon Polis İdarəsi aparıb.
Zamin Salayev ittihamı qəbul etmir, tutulduğu gündən aclıq aksiyası keçirir. Aclıq müddətində Zamin Salayev 47 kiloqram çəki itirib, onun səhhəti ağırlaşıb. Vəkillərinin Zamin Salayevi ev dustaqlığına buraxmaq barədə müraciətləri nəticə verməyib.
“Turan” bildirir ki, mayın 11-i Qaradağ Rayon Məhkəməsində keçirilən prosesdə danışan Zamin Salayev heç bir cinayət törətmədiyini, müxalif fəaliyyətinə görə qərəzli şəkildə cəzaya məruz qaldığını deyib.
Natiq Süleymanov və iki şahidin ifadə verdiyi iclasda Zamin Salayevin vəkilləri vəsatət qaldıraraq zərərçəkənin hadisədən 12 saat əvvəl və 8 saat sonra harada olduğunu dəqiqləşdirmək üçün onun mobil telefonunun anten dairəsi bilgilərinin alınmasını istəyiblər. Vəsatət təmin olunmayıb.
AXCP sədri Əli Kərimli yazır ki, 11 may iclasında məhkəmə Zamin Salayev barəsində həbs qərarını yenə dəyişməyib: “Rejim Zamin Salayevin üzərində antiinsani eksperiment aparır. Sanki onun aclığın neçənci günündə öləcəyini gözləyir. Bu qəddarlığa, bu işgəncəyə hamı etiraz etməlidir”.
İttihama əsasən, hadisə Lökbatan dairəsində baş verib. Daxili İşlər Nazirliyindən verilən məlumata görə, ərazidəki müşahidə kameraları işlək vəziyyətdə olmayıb. Müdafiəçiləri bildirir ki, Zamin Salayev fevralın 7-də Bakıdan Salyana qayıdırmış, Lökbatanda avtomobil gözləyən zaman bıçaqlı şəxs ona hücum edib, cəbhəçi özünü müdafiə etmək istəyib və bu zaman polis əməkdaşları peyda olub.
Zamin Salayev 2020-ci il aprelin 20-dən 2022-ci il yanvarın 19-dək ağır cinayətdə ittiham etməklə böhtan və təhqir ittihamı ilə həbsdə yatıb, siyasi məhbus sayılıb. Həmin həbsdən bir müddət öncə Zamin Salayev sosial şəbəkədə video yayaraq Salyan Rayon Polis İdarəsinin bölmə rəisi, polis kapitanı Həmzə Əzizovu bir qadına münasibətdə qanunazidd hərəkətlərdə günahlandırıb. Bundan sonra Həmzə Əzizov Salyan Rayon Məhkəməsində xüsusi ittiham qaydasında iddia qaldıraraq Zamin Salayevin cinayət məsuliyyətinə cəlb olunmasını istəyib.
AXCP sədri Zamin Salayevdən yazıb
Zamin Salayev: məhkəmə qərar verdi
Zamin Salayev qərarından dönmür
Zamin Salayev 8 kiloqram arıqlayıb
Əli Kərimli: “Biganə qalmamalıyıq”
Zamin Salayev oğluna nədən gileylənib?
Əli Kərimli Zamin Salayevə müraciət edib
Vəkil Zamin Salayevə baş çəkib
“Bu zorakılıq dövlətimizi hörmətdən salır”
Zamin Salayev qərarından şikayət verilib
Əli Kərimli Zamin Salayevə səsləndi
Zamin Salayevin istintaqı bitib
Milli Şuranın Zamin Salayevə müraciəti
Zamin Salayev prosesi başlayır
