TƏBİB-in statusu
Mayın 1-də fərman imzalayan prezident İlham Əliyev Tibbi Ərazi Bölmələrini İdarəetmə Birliyinin (TƏBİB) nizamnaməsini təsdiqləyib. Nazirlər Kabinetinə qurumun strukturunu, əməyin ödənişi fondunu, işçilərinin say həddini və əmək haqlarının (vəzifə maaşının, vəzifə maaşına əlavələrin, mükafatların və digər ödənişlərin) məbləğini bir ay müddətində təsdiqləmək tapşırılıb.
TƏBİB 2018-ci il dekabrın 20-də İcbari Tibbi Sığorta üzrə Dövlət Agentliyinin qurumu – publik hüquqi şəxs kimi yaradılıb, bir çox dövlət tibb müəssisəsi 2020-ci il yanvarın 1-dən onun tabeliyinə verilib.
1 may 2023-cü ildə rəsmiləşən nizamnaməyə görə, TƏBİB tabeliyinə verilən dövlət səhiyyə sisteminə daxil olan tibb müəssisələrinin idarə edilməsini və fəaliyyətinə nəzarəti həyata keçirən publik hüquqi şəxsdir.
TƏBİB-in idarəetmə orqanları Müşahidə Şurası və icraçı direktordur.
Quruma ümumi rəhbərliyi və nəzarəti həyata keçirən şura 5 üzvdən ibarətdir. Şuranın tərkibinə İcbari Tibbi Sığorta üzrə Dövlət Agentliyi İdarə Heyətinin sədri (sədr olmaqla), səhiyyə nazirinin müavini, əmək və əhalinin sosial müdafiəsi nazirinin müavini, İcbari Tibbi Sığorta üzrə Dövlət Agentliyinin İdarə Heyəti sədrinin müavini, Səhiyyə İşçiləri Həmkarlar İttifaqının sədri daxildir.
TƏBİB-in fəaliyyətinə cari rəhbərliyi şuranın vəzifəyə təyin etdiyi icraçı direktor həyata keçirir. İcraçı direktorun şuranın vəzifəyə təyin və etdiyi 3 müavini var.
