Hərbi-siyasi ittifaq olan Şimali Atlantika Müqaviləsi Təşkilatı (NATO) böyüyür. Novator.az bildirir ki, aprelin 4-də Finlandiyanın quruma qoşulması rəsmiləşir, bununla üzvlərin sayı 31-ə yüksəlir.

Mənzil-qərargahı Brüsseldə yerləşən NATO-nu 1949-cu ildə ABŞ, Belçika, Böyük Britaniya, Danimarka, Fransa, İslandiya, İtaliya, Kanada, Lüksemburq, Niderland, Norveç, Portuqaliya yaradıb.

Türkiyə və Yunanıstan quruma 1952-ci ildə qoşulublar.

Qərbi Almaniya (1990-cı ildən Almaniya) 1955-ci ildə NATO-ya üzv olub.

İspaniya hərbi-siyasi ittifaqa 1982-ci ildə girib.

Çexiya, Macarıstan və Polşanın NATO üzvlüyü 1999-cu ildə rəsmiləşib.

Bolqarıstan, Estoniya, Latviya, Litva, Rumıniya, Slovakiya və Sloveniya 2004-cü ildən NATO-da təmsil olunurlar.

Albaniya və Xorvatiyanın üzvlüyü 2009-cu ildə başlayıb.

Monteneqro 2017-ci ildən ittifaqdadır.

Şimali Makedoniya NATO sıralarına 2020-ci ildə əlavə edilib.

2022-ci il mayın 12-də Finlandiya və İsveç NATO-ya qoşulmaq üçün müraciət ediblər, iyunun 29-u alyansa rəsmi dəvət alıblar.

Qaydalara görə, NATO-ya qoşulmağın ilk rəsmi addımı üzv ölkələrin və namizədin hərbi alyansdakı səfirlərinin protokol imzalaması sayılır. Hər bir üzv ölkənin razılığı mütləqdir.

Protokol imza mərhələsini aşdıqdan sonra hərbi alyansa üzv dövlətlərin, o cümlədən namizəd ölkənin parlamentində ratifikasiya edilir, yalnız bundan sonra alyansa qəbul rəsmiləşir.

Finlandiya ratifikasiya mərhələsini aşıb, ancaq Türkiyə və Macarıstan hələ İsveçə yaşıl işıq yandırmayıb.

Mənbə: CNBC.com