Dünya Səhiyyə Təşkilatı pandemiya açıqlaması yayıb. Qeyd olunur ki, 2022-ci il dekabrın 26-dan 2023-cü il yanvarın 22-dək 11 milyon 44 min 336 nəfər koronavirusa yoluxub, 55 min 108 nəfər infeksiyadan ölüb. Əvvəlki 28 günlə müqayisədə yoluxmaların 25 faiz azaldığı, ölüm hallarının 13 faiz artdığı vurğulanır.

Yeni koronavirus infeksiyası 2019-cu ilin dekabrında Çində üzə çıxaraq dünyanı bürüyüb. 2020-ci il martın 11-də Dünya Səhiyyə Təşkilatı pandemiya elan edib.

Worldometers.info-da yayılan beynəlxalq statistikaya görə, 231 ölkə, ərazi və məkanda 674 milyondan çox adam koronavirusa yoluxub, onların 6,7 milyonu həyatını itirib.

Novator.az bildirir ki, milli hesabata əsasən, Azərbaycanda 827780 nəfər koronavirusa yoluxub, onların 10077-si vəfat edib, 244-ü aktiv xəstədir, qalanları sağalıb.

Ölkədə infeksiyaya ilk yoluxma 2020-ci il fevralın 28-də, xəstəlikdən ilk ölüm martın 12-də qeydə alınıb.