Dayanacaq məsələsi niyə dayanıb?
İlqar Məmmədov
Respublikaçı Alternativ Partiyasının sədri
…Partiyamızın müharibə veteranları ilə görüşündə qaldırılan problemlərdən biri işlə təminat məsələsi idi. Veteranların fikrindən keçən sahələr arasında minik avtomobili dayanacaqlarında nəzarətçi işi də vardı. Anlaşdıq ki, bu sahənin iqtisadi göstəricilərini öyrənəndən sonra bir təklif irəli sürərik.
Çox kobud hesablamaya görə, küçə dayanacaqlarında qeyri-rəsmi yığılan vəsait ildə yüz milyonlarla manatdır. Məbləğin daha dəqiqini, eləcə də bu qeyri-rəsmi sahədə nə qədər adamın işlədiyini öyrənmək üçün Dövlət Statistika Komitəsinə sorğu göndərdik. Rəsmi cavab “bilmirik, pullar hamısı bir-birinə qarışıb” oldu.
Veteran təşkilatından demişdilər ki, dayanacaq nəzarətçisi işi rəsmiləşsə, bəlkə ona da kvota ayrılar, üzvlərini işlə təmin edər. Amma rəsmi heç nə yoxdur deyə hələlik ancaq birinci addımı düşünməliyik, yəni bu sahənin, iqtisadiyyat naziri Mikayıl Cabbarov demiş, “ağardılması”nı. Hələlik bunun öhdəsindən nəinki Mikayıl Cabbarov, hətta İlham Əliyev gələ bilmir.
Prezidentin 13 aprel 2014-cü il çıxışından: “İnkişaf etmiş şəhərlərdə olduğu kimi, bizdə də yaxın aylarda küçələrdə parkinq avtomatları quraşdırılacaq ki, insanlar maşınlarını orada rahat park edə bilsinlər. Bu sahədə də şəffaflıq təmin edilməlidir. Bakı gözəl, müasir, inkişafda olan şəhərdir. İnkişaf etmiş ölkələrin heç bir şəhərində küçələrdə əlində çubuq parkinqlə məşğul olan tənzimləyiciləri görmək mümkün deyil. Bu, bizə yaraşmır, yaraşmaz. Özü də heç kim bilmir ki, onlar harada işləyirlər, yığdıqları pulları hara verirlər, kimə ötürürlər. Mən başa düşürəm ki, indi yerüstü parkinq olmadığı üçün bunların sürücülərə köməyi dəyir. Bunu başa düşürəm. Ona görə hesab edirəm ki, biz təmkinli olmalıyıq. Amma normal, şəffaf park avtomatları quraşdırılandan sonra, əlbəttə ki, əlində çubuq olan vətəndaşları biz gərək digər işlərlə təmin edək”.
Az qala 9 il keçib, nə şəffaflıq var, nə avtomatlar, nə də insanların təmin ediləcəyi “digər iş”.
