Harada dayanmaq?
Arif Hacılı
Müsavat Partiyasının başqanı
Rusiya-Ukrayna müharibəsi Azərbaycan-Ermənistan münaqişəsini sərhədlərin toxunulmazlığı prinsipi əsasında həll etmək üçün əlavə şans yaradıb. Dünya güclərinin Ukraynanın ərazi bütövlüyünün qorunması naminə müharibəyə qoşulması Yuxarı Qarabağ probleminin həllində mövqeyimizi gücləndirib. Qərb danışıqların ikitərəfli qaydada aparılmasını və sülh müqaviləsinin bağlanmasını tələb edir. Rusiyanın təcrid olunduğu bir məqamda onun əsas müttəfiqi olan Ermənistan çətin seçim qarşısındadır.
Bütün bu üstünlüklərdən yararlanmaq əvəzinə yanlış siyasət yürüdərək Rusiyanın hərbi müttəfiqi olan Ermənistana Azərbaycanı Putin Rusiyasının dostu kimi təqdim etməsi imkanı yaratmaq olmaz. Ermənistan Rusiyanın hərbi müttəfiqi olaraq qalmaqla yanaşı müxtəlif siyasi manevrlər və Azərbaycan hakimiyyətinin Kremldən qopa bilməməsindən istifadə edərək həm də anti-Rusiya koalisiyasının himayəsinə nail olmağa çalışır.
Putin Rusiyasının tərəfdaşı kimi görünmək Azərbaycana çox baha başa gələ bilər. Rusiya 1828-ci ildən bu üzə kənd-kənd, şəhər-şəhər qurub yaratdığı Ermənistan dövlətinin maraqlarını heç vaxt Azərbaycana qurban verməz. Azərbaycan hakimiyyəti aşkar görünən həqiqətləri nəzərə alaraq öz siyasətində əsaslı dönüş yaratmağa borcludur.
